-Суллагдаад гараад ирсэн чинь миний фэйсбүүк хаягийг ажиллагаагүй болгочихсон байсан-

“Монголын цагдаа нар БНХАУ-ын иргэдийг хараа хяналтгүйгээр улсын хилээр нэвтрүүлж байна” гэх утга бүхий мэдээллийг цахим орчинд нийтэлсэн “Goo Goo” гэх фэйсбүүк хаягтай бүсгүйг цагдаагийн байгууллагаас саатуулсан талаар бид ЦЕГ-ын Хэвлэл мэдээллийн төвийн дарга, дэд хурандаа Б.Баатархүүгээс тодруулан хүргэсэн. Түүнийг өчигдөр орой сулласан бөгөөд хэргийн талаар иргэн О-той  холбогдож, тодрууллаа.

-Чамайг ямар үндэслэлээр хэдэн цаг хорьсон юм бэ?

-Хүнийг хууль бусаар дагаж мөрдсөн, худал мэдээлэл тараасан гэх үндэслэлээр саатуулсан гэсэн. 24 цагийн хугацаанд Цагдан хорих 461 дүгээр ангид саатуулаад, өчигдөр орой суллалаа.

 -Суллахдаа юу гэж хэлсэн бэ?

-Ямар ч үг дуугүй, ямар нэг анхааруулга, мэдээлэл огт өгөөгүй сулласан. Ганцхан “Батлан даалтад гаргалаа” гэж хэлсэн.

-Үнэхээр БНХАУ-ын иргэд цагдаагийн хамгаалалт дор улсын хилээр олноороо нэвтэрч байгаа нь үнэн юм уу?

-Үнэн байлгүй яах вэ. Шууд бичлэг хийсэн шүү дээ. Албаныхан худал мэдээлэл гэж байгаа нь намайг зүгээр гүтгэж байгаа юм. Тэд гүтгэж, хорихоос өөрөөр намайг зогсоох боломжгүй гэсэн үг.  

-Чамд хэрэг бүртгэл нээчихсэн байгаа юм билээ?

-Тийм ээ, бүүр хавтаст хэрэг нээчихсэн байгаа гэнэ лээ. Намайг хорихоос өмнө хоёр, гурав хоног манай гэрийн ойролцоогоор танихгүй хүмүүс эргэлдэж, намайг дагаж байсан юм билээ. Би тухайн үед гэртээ байгаагүй учраас тэрийг нь мэдээгүй. Харин энэ тухай манай гэрийнхэн надад хэлсэн.

-Одоо чиний байдал ямар байна вэ?

-Намайг ямар ч хамаагүй аргаар хорих гээд  байгаа. Би үнэхээр маш их айдастай байна. Одоо намайг хэн ч дагаад явж байж магад. Хаанаас, хэзээ ч баривчлагдаж магадгүй болохоор айдастай л байна. Суллагдаад гараад ирсэн чинь миний фэйсбүүк хаягийг ажиллагаагүй болгочихсон байсан. Орох боломжгүй алдаа заагаад байхаар нь арай гэж хүнээр янзлууллаа. Тэд намайг айлгаж чадлаа л гэж бодож байгаа байх. Үгүй, би хэзээ ч айхгүй, хэлэх ёстой үгээ хаана ч хэлнэ. Эх орныхоо төлөө тэмцэнэ. Айхгүй шүү гэдгээ харуулна.