МУГЖ Б.Баатархүүгийн төрсөн өдөр өнөөдөр тохиож байна. Түүнийг бид хөгжилтэй, хошин тайзны номерууд болон дэлгэцийн Сэргээш I, II, “Шарталт”, “Худалч залуу”, “Ганц бие бүсгүйчүүд”, “Хүүгүй ломбард”, “Омарын эрэл”, “Содура”, “Гурван найз” зэрэг уран бүтээлийн дүрээр нь андахгүй сайн мэднэ. Өдгөө харин "Эмоци" продакны жүжигчнээр ажиллаж байгаа бөгөөд олон сайхан дэлгэцийн бүтээлд ч дүр бүтээсээр буй билээ.

       Тэрбээр анх жүжигчин мэргэжлийг сонгож байсан тухайгаа "Анх 1986 онд Эрдэнэт хотын Хүүхэлдэйн театрт орсноор урлагийн зам гараа эхэлсэн. Тус театрт таван жил гаруй ажиллаж, их ч зүйл сурсан.  Тэгээд л Эрдэнэтээсээ хот руу орж, 1993-1997 онд Ч.Найдандорж багшийнхаа удирдлага дор СУИС-ийг жүжигчин мэргэжлээр төгссөн. Манай ангиас урлагт олон сайхан уран бүтээлчид төрсөн байдаг. МУГЖ, Л.Баттулга буюу Аглуу, УДЭТ-ын жүжигчин өндөр Түвшин гээд олон уран бүтээлч бий. Сургуулиа төгсөөд л Х-ТҮЦ продакшнд ажиллаж эхэлсэн. Анхлан Сэргээш киногоор л үзэгчид мэддэг болсон байх. Дараа нь Амбий, Хүрэлээ хоёртойгоо  “Комеди арт” хамтлаг байгуулан, дөрвөн жил хамтарч уран бүтээл хийсэн" гэж байв. Түүнд төрсөн өдрийн мэнд хүргэж, уран бүтээлийн өндөр амжилт хүсье.