"МЗЭ-ийн шагналт Б.Цогнэмэхийн зохиол, Төрийн соёрхолт, Урлагийн гавьяат зүтгэлтэн Н.Наранбаатарын найруулга "Тэнгэрийн хүү" түүхэн туульсын жүжгийн Модун Шаньюйгийн дүрд жүжигчин Б.Шинэбаяр тоглож байна. Анх драмын театрын студи ангийн жүжигчин ангийн жүжигчнээр ажиллаж байхдаа тэр “Уучлаарай та дугаар андуурч”, “Тэнгэрийн хүү”, “Гамлет”, “Оролмаа”, "Анна Каренина", "Тамгагүй төр" тэргүүтэй Монголын болон дэлхийн сонгодог жүжигт оролцон тоглосон бөгөөд Төрийн соёрхолт Н.Наранбаатар найруулагчийн “Өчигдөр”, Ардын жүжигчин Б.Мөнхдорж найруулагчийн “Хэрээт төгөл” жүжигт туслах найруулагчаар ажилласан байдаг.

        Мөн Монгол Улсын Урлагийн гавьяат зүтгэлтэн Б.Баатар найруулагчийн “Адууны түүх” жүжгийн Жанжаа, офицер гэх хоёр дүрээс эхлээд Соёлын тэргүүний ажилтан, найруулагч Ч.Түвшингийн “Жаргаагүй нар” жүжгийн Д.Нацагдорж, Төрийн соёрхолт, найруулагч Н.Наранбаатарын “Бүсгүйн зурвас” жүжгийн Ирээдүй, Н.Наранбаатар найруулагчийн “Хаадын хаан” жүжгийн Хорчин бөө, найруулагч А.Чингүний “Надтай үлдээч” жүжгийн Хосбаяр, найруулагч Ш.Ёндоншаравын “Сычуаны сайн хүн” жүжгийн үсчин Шу Фугийн дүрийг бүтээсэн юм. Харин дэлгэцэд "Аав", "Учрал", "Хуримын даашинзтай бүсгүй", "Атганд үлдсэн эрдэнэ", "Хязгааргүй", "Босго тотго", "Учрал", "Цагаан хадаг", "Тэгри чину", "Намайг хайрла" зэрэг кинонд тоглосон билээ.

Тэрбээр жүжигчнээс гадна сайн дуучин юм. Жүжигчин Э.Тодгэрэл, Б.Золжаргал нартай хамт "Драмын 3" хамтлагийг байгуулж "Макарина", "Нүдээ Аниад Төсөөл" тэргүүтэй уран бүтээлийг хүргэсэн билээ. 

         Тэр багаасаа л урлагт сонирхолтой, дөртэй, хүсэл тэмүүлэлтэй хүүхэд байжээ. Аав нь “Ган зам” хэвлэх үйлдвэрт хэвлэгч, ээж нь Улаанбаатар воган депод ажилладаг байжээ. Тиймдээ ч “Ганзам” хоёрдугаар сургуульд найман жил сураад, хорооллын “Жаргалан” бүрэн дунд сургуульд ес, аравдугаар ангиа дүүргэсэн байна.