Улаанбаатарын их дуулгын дараа үргэлжлээд зургадугаар сарын 26-28-ны өдрүүдэд Хятадын Чиндао хотод Олон улсын жүдо бөхийн холбоо “IJF”-ийн цуврал “Гран при” тэмцээн боллоо. “Улаанбаатар Гранд слам”-д барилдсан бөхчүүд тус тэмцээнд барилдсан. Энэ удаагийн “Гран при”-д 57 орны эрэгтэй 265, эмэгтэй 235, нийт 500 тамирчин өрсөлдлөө. Манай улсаас эрэгтэйчүүдийн 60 кг-ын жинд Б.Сүхбат, Т.Түмэнжаргал, 66 кг-д Ё.Басхүү, Т.Төрболд, 73 кг-д О.Уранбаяр, А.Өсөхжаргал, 81 кг-д О.Шинэбаяр, Ж.Энхтөр, -100 кг-д Т.Ган-Эрдэнэ, Б.Хүдэрчулуун, +100 кг-д Ө.Пэрэнлэйжажц нар барилдсан. Харин эмэгтэйчүүдийн 48 кг-ын жинд Г.Наранцэцэг, Г.Бямбасүрэн, 52 кг-д Б.Уранзаяа, 57 кг-д О.Оюунчимэг, Л.Сосорбарам, 70 кг-д У.Анужин, -78 кг-д А.Дуламсүрэн, +78 кг-д Э.Энхзул нар өрсөлдсөн. МУГТ Ё.Басхүү, ОУХМ О.Оюунчимэг нараас бусад тамирчин үнэхээр чамлалттай барилдлаа.

ЭРЭГТЭЙЧҮҮДИЙН 66 КГ-Д Ё.БАСХҮҮ ШАГНАЛТ V БАЙР

    Эрэгтэйчүүдийн 66 кг-ын жинд 34 тамирчин өрсөлдсөн. Манай улсаас ДАШТ-ий хошой хүрэл медальт, МУГТ Ё.Басхүү, Т.Төрболд нар барилдлаа. Ёндонпэрэнлэйн Басхүү “А” хэсгийн нэгдүгээр тойрогт гоц мөргөн ялалт авсан. Хоёрдугаар тойрогт Хятадын WANG Jiangfeng-ийг, гуравдугаар тойрогт Унгарын Bence PONGRACZ-ыг ялсан.

    Улмаар “А” хэсгийн аваргын төлөөх барилдааныг олимп, дэлхийн аварга, Японы  ABE Hifumi-тэй үнэхээр сайн барилдсан. Үндсэн цаг хэн, хэнээсээ үнэлгээ авч чадаагүй. Цаг сунгасан нэмэлт цагийн барилдаан хожигдсон. Дагах тойргийн барилдаанд Узбекистаны Abdurakhim NUTFULLOEV-ыг ялж, шигшээ барилдаан хүрэл медалийн төлөө Бразилын залуу тамирчин Ronald LIMA-д хожигдож, шагналт тавдугаар байр шалгарсан.

    Төмөрхүүгийн Төрболд “С” нэгдүгээр тойрогт гоц мөргөн ялалт авсан. Хоёрдугаар тойргийн барилдаан Казахстаны Gusman KYRGYZBAYEV-т ялагдсан.

ЭМЭГТЭЙЧҮҮДИЙН 57 КГ-Д О.ОЮУНЧИМЭГ ШАГНАЛТ V БАЙР

     Эмэгтэйчүүдийн 57 кг-ын жинд ОУХМ О.Оюунчимэг, ОХУМ Л.Сосорбарам нар барилдсан. Тус жинд 36 тамирчин өрсөлдлөө. Оюунгэрэлийн Оюунчимэг “В” хэсгийн нэгдүгээр тойрогт гоц мөргөн ялалт авсан. Хоёрдугаар тойрогт Өмнөд Солонгосын JUNG Nari-ийг, гуравдугаар тойрогт Германы Seija BALLHAUS-ыг ялсан. Хэсгийн аваргын төлөөх барилдаанд Францын Martha FAWAZ-д хожигдсон. Дагах тойргийн барилдаанд Израилийн NELSON LEVY Timna-г ялсан. Шигшээ барилдаанд хүрэл медалийн төлөө Японы Momo TAMAOKI-д ялагдаж, шагналт V байрт орлоо. ОУХМ, О. Оюунчимэг хэсэг хугацаанд 52 кг-ын жинд барилдсан. Харин энэ удаа буцаад 57 кг-ын жиндээ маш сайн барилдаж, дэлхийн шилдгүүдийг цувруулан яллаа. Момо Тамаокигоос босоо барилдаанд дутах зүйл алга. Хэвтээ барилдаанаа сайжруулж, хүч, бяраа нэмэгдүүлж чадвал, түүнд  52 кг-аас илүүтэйгээр 57 кг-ын жин илүү таарах, тохиромжтой жин юм байна.

    ОУХМ Лхагвасүрэнгийн Сосорбарам “D” хэсгийн нэгдүгээр тойрогт Энэтхэгийн Yamini MOURYA-г, хоёрдугаар тойрогт Узбектистаны Shukurjon  AMINOVA-г ялсан. Гуравдугаар тойрогт Бельгийн Mina LIBEER-д хожигдсон.

ЭРЭГТЭЙЧҮҮДИЙН 60 КГ-Д Б.СҮХБАТ, Т.ТҮМЭНЖАРГАЛ

    Эрэгтэйчүүдийн 60 кг-ын жинд ОУХМ Б.Сүхбат, Т.Түмэнжаргал нар барилдсан. Тус жинд 38 тамирчин өрсөлдсөн. Бямбасүрэнгийн Сүхбат “D” хэсгийн нэгдүгээр тойрогт гоц мөргөн ялалт авсан. Хоёрдугаар тойрогт Словенийн David STARKEL-д даралтаар ялагдсан. ТүвшинтөрийнТүмэнжаргал “В” хэсгийн нэгдүгээр тойрогт БНАСАУ, Хойд Солонгосын  RI Nam Yong-ийг, хоёрдугаар тойрогт Израилийн “Залуу-Од” Izhak ASHPIZ-ыг ялсан. Гуравдугаар тойрогт Узбекистаны залуу тамирчин Samariddin  KUCHKAROV-т хожигдлоо.

 ЭРЭГТЭЙЧҮҮДИЙН 73 КГ-Д О.УРАНБАЯР, А.ӨСӨХЖАРГАЛ

     Эрэгтэйчүүдийн 73 кг-ын жинд ОУХМ О.Уранбаяр, А.Өсөхжаргал нар барилдсан. Тус жинд 48 тамирчин өрсөлдсөн. Одбаярын Уранбаяр “В” хэсгийн нэгдүгээр тойрогт гоц мөргөн ялалт авсан. Хоёрдугаар тойрогт Туркийн Bilal CILOGLU-д хожигдлоо. Залуу тамирчин Алтайбаатарын Өсөхжаргал “D” хэсгийн нэгдүгээр тойрогт гоц мөргөн ялалт авсан. Хоёрдугаар тойрогт  Английн LEVY Benjamin-д ялагдсан.

ЭРЭГТЭЙЧҮҮДИЙН 81 КГ-Д О.ШИНЭБАЯР, Ж. ЭНХТӨР

    Эрэгтэйчүүдийн 81 кг-ын жинд О.Шинэбаяр, Ж.Энхтөр нар барилдсан. Тус жинд 50 тамирчин өрсөлдсөн. Оюунчимэгийн Шинэбаяр “В” хэсгийн нэгдүгээр тойрогт Туркменистаны Agajan AYHANOV-ыг ялсан. Хоёрдугаар тойрогт Австрийн Bernd FASCHING-д ялагдсан.  Жүгдэргаравын Энхтөр “С” хэсгийн нэгдүгээр тойрогт Финландын Oskari MAKINEN-д хожигдлоо.

ЭРЭГТЭЙЧҮҮДИЙН -100 КГ-Д Т.ГАН-ЭРДЭНЭ, Б.ХҮДЭРЧУЛУУН

Эрэгтэйчүүдийн -100 кг-ын жинд  Т.Ган-Эрдэнэ, Б.Хүдэрчулуун нар барилдсан. Тус жинд 31 тамирчин өрсөлдсөн.Цэрэнбатын Ган-Эрдэнэ “В” хэсгийн нэгдүгээр тойрогт Хятадын Fuchun HUANG-д, Баярцэнгэлийн Хүдэрчулуун “С” хэсгийн нэгдүгээр тойрогт Польшийн Piotr KUCZERA-д тус тус ялагдсан.

ЭРЭГТЭЙЧҮҮДИЙН +100 КГ-Д Ө.ПЭРЭНЛЭЙЖАМЦ

   Эрэгтэйчүүдийн +100 кг-ын жинд Ө.Пэрэнлэйжамц барилдсан. Тус жинд 28 тамирчин өрсөлдсөн. Өсөхбаярын Пэрэнлэйжамц “С” хэсгийн нэгдүгээр тойрогт Польшийн Grzegorz TERESINSKI-д хожигдлоо.

ЭМЭГТЭЙЧҮҮДИЙН 48 КГ-Д Г.НАРАНЦЭЦЭГ, Г.БЯМБАСҮРЭН

   Эмэгтэйчүүдийн 48 кг-ын жинд ОУХМ Г.Наранцэцэг, залуу тамирчин Г.Бямбасүрэн нар барилдсан. Тус жинд 29 тамирчин өрсөлдсөн. Ганбаатарын Бямбасүрэн “А”хэсгийн нэгдүгээр тойрогт, Өмнөд Солонгосын  LEE Yoojin-д ялагдсан. ОУХМ Ганбаатарын Наранцэцэг “D” хэсгийн нэгдүгээр тойрогт гоц мөргөн ялалт авсан. Хоёрдугаар тойрогт Испанийн Jana CID BALCELLS-д хожигдсон.

ЭМЭГТЭЙЧҮҮДИЙН 52 КГ-Д Б.УРАНЗАЯА

    Эмэгтэйчүүдийн 52 кг-ын жинд залуу тамирчин Б.Уранзаяа барилдсан. Тус жинд 33 тамирчин өрсөлдсөн. Баянмөнхийн Уранзаяа “В” хэсгийн нэгдгээр тойрогт гоц мөргөн ялалт авсан. Хоёрдугаар тойрогт Испанийн Ayumi LEIVA SANCHEZ-д ялагдлаа.

ЭМЭГТЭЙЧҮҮДИЙН 70 КГ-Д У.АНУЖИН

    Эмэгтэйчүүдийн 70 кг-ын жинд ОУХМ У.Анужин барилдсан. Тус жинд 43 тамирчин өрсөлдсөн. Уран-Өлзийгийн Анужин “А” хэсгийн нэгдүгээр тойрогт гоц мөргөн ялалт авсан. Хоёрдугаар тойрогт Узбекистаны Shirinjon YULDOSHOVA-д хожигдлоо.

ЭМЭГТЭЙЧҮҮДИЙН -78 КГ-Д А.ДУЛАМСҮРЭН

   Эмэгтэйчүүдийн -78 кг-ын жинд А. Дуламсүрэн барилдсан. Тус жинд 35 тамирчин өрсөлдсөн. Айлтгүйбаатарын Дуламсүрэн “В” хэсгийн нэгдүгээр тойрогт гоц мөргөн ялалт байгуулсан. Хоёрдугаар тойрогт Өмнөд Солонгосын KIM Juyun-д ялагдсан.   

ЭМЭГТЭЙЧҮҮДИЙН +78 КГ-Д Э.ЭНХЗУЛ

   Эмэгтэйчүүдийн +78 кг-ын жинд Э.Энхзул барилдсан. Тус жинд 27 тамирчин өрсөлдсөн. Энхбаярын Энхзул “В” хэсгийн нэгдүгээр тойрогт Гүржийн Sophio SOMKHISHVILI-д хожигдлоо.