Монголын оюутны спортын холбооноос 2025 оны Монгол Улсын оюутны аварга шалгаруулах шатрын  тэмцээнийг энэ сарын 14-15-ны өдрүүдэд “Зууны шатар” клубт амжилттай зохион байгууллаа. Тус тэмцээнд 12 их, дээд сургуулийн эрэгтэй 36, эмэгтэй 18, нийт 54 оюутан шатарчид өрсөлдөв. Тэмцээн эрэгтэй, эмэгтэй ганцаарчилсан болон багийн ангиллаар явагдсан бөгөөд эрэгтэй ангилалд “Мон-Алтиус” дээд сургуулийн оюутан, ФМ С.Чингүүн 6.5 оноотой тэргүүн байрт шалгарч, алтан медаль хүртжээ. Харин МУИС-ийн оюутан ОУМ Х.Итгэлт мөнгөн медаль хүртэж, ШУТИС-ийн оюутан СМ А.Эрхэмбаяр хүрэл медалийн эзэн болов.

       Эмэгтэй ангилалд тамирчид долоон өрөгт тоглосноос “Оточ манрамба” их сургуулийн оюутан О.Өлзийхишигжаргал 5.0 оноотой алтан  медаль хүртсэн юм. Харин МУИС-ийн оюутан ФМ Н.Наран-Эрдэнэ мөнгөн медаль хүртэж, “Мон-Алтиус” дээд сургуулийн оюутан, А. Буянзаяа 4.5 оноотой хүрэл медалийн эзэн боллоо.

       Улмаар тэмцээний нийлбэр дүнгээр тэргүүн байрт “Мон-Алтиус” дээд сургуулийн баг 17.5 оноо авч, багийн тамирчин С. Чингүүн, Г. Булганхан, А. Буянзаяа нар шалгарч алтан медаль хүртэв. Харин МУИС-ийн Х. Итгэлт, Э. Золбоот, Н. Наран-Эрдэнэ нар 16.5 оноогоор мөнгөн медалийн эзэн болж, III байрт ШУТИС-ийн багийн шатарчин А. Эрхэмбаяр, Ч. Тайванбат, Д.Анужин нар нь 16.5 оноогоор хүрэл медаль хүртэв.

       Тус тэмцээний ангилал тус бүрийн эхний гурван байрт шалгарсан шатарчид энэ оны есдүгээр сард Армени Улсад зохион байгуулагдах дэлхийн оюутны аварга шалгаруулах шатрын тэмцээнд Монгол Улсаа төлөөлөн оролцох эрхтэй болов.