Сансрын технологиор тэргүүлэгч SpaceX (SPCX.O) компани Starship пуужингийн удаах туршилтаа энэ сарын 22-ны өдөр хийхээ мэдэгдлээ. Энэхүү даалгавар нь эх дэлхийн тойрог замд анх удаа хиймэл дагуул оруулах ажлын туршилт юм.

       Starship хөлгийн14 дэх удаагийн энэхүү нислэг нь сүүлд хийсэн туршилтаас томоохон дэвшлийг хэрэгжүүлэх учиртай. Өнгөрөгч долоодугаар сард хийсэн нислэгээр пуужин тойрог замд бүтэн оролгүй задгай сансарт гараад, эх дэлхийдээ буцаж газардахдаа саборбитал траектороор дайран өнгөрсөн юм. Энэ удаад Starship хөлгийг эх дэлхийн тойрог замд оруулснаар хөлгийг урт хугацааны туршид хянах нүсэр ажил болж байна. Туршилтын үр дүнд Starlink V3 хиймэл дагуулын анхны хэсгийг тойрог замд байршуулах боломжтой болно.

    Одоогоор бүс нутгийн сансрын зохицуулах байгууллагын зөвшөөрлийг хүлээж буй уг даалгавар нь ойролцоогоор 10 цаг үргэлжлэх төлөвтэй байна. Starship дэлхийгээс дээш 275 километрийн өндөрт нисэж, 6 удаа бүтэн эргэлдсэний эцэст Чилийн баруун талын Номхон далайд буух аж. Ийнхүү SpaceX компани тээвэрлэгч пуужингийн хөөргөлт, сансарт салах үйл ажиллагаа болон буцаж эх дэлхий дээр аюулгүй газардах ажиллагааг анх удаа бүрэн туршихаар төлөвлөж байгаа аж.

      Энэ бол сансрын хөлөг хийгээд тээвэрлэгч пуужин аль алиныг дэлхийд аюулгүй газардуулж, гэмтэлгүй төхөөрөмжүүдийг дараагийн сансрын нислэгэд дахин ашиглах боломжийг бий болгосон томоохон алхам юм. Ингэснээр сансрын технологийн зардлыг бууруулах асар том ач холбогдолтой. Сансрын төхөөрөмжийг дахин ашигладаг болсноор сансрын нислэгийн давтамжийг нэмэгдүүлж, Ангараг болон сар луу саадгүй хүрэх технологийн үндэс болох аж.

С.Энхцэцэг