Монголын жүдо бөхийн холбооны дэд ерөнхийлөгч, Монгол Улсын Хөдөлмөрийн Баатар, “Макс” руппийн ерөнхийлөгч Д.Ганбаатар, Монгол Улсын Аж Үйлдвэрийн Гавьяат Ажилтан, “Макс Групп"-ийн ерөнхий захирал Д.Цэрэнжигмэд болон "Макс” группийн удирдлагууд “Парис-2024” зуны олимпод амжилттай оролцож мөнгөн медаль хүртсэн Жүдо бөхийн үндэсний шигшээ багийн тамирчин дэлхийн аварга Б.Баасанхүү болон Жүдо бөхийн үндэсний шигшээ багийн дасгалжуулагч нарыг хүндэтгэн хүлээн авч уулзлаа.

         Монголын жүдо бөхийн холбооны дэд ерөнхийлөгч, “Макс”группийн ерөнхийлөгч Д.Ганбаатар “Парис-2024” олимпын үеэр Үндэсний шигшээ багийн тамирчин, дэлхийн аварга Б.Баасанхүү ба дасгалжуулагч нартай биечлэн уулзаж, гаргасан амжилтыг нь өндрөөр үнэлэн авто машинаар шагнаж, дасгалжуулагч нарыг мөнгөн шагналаар урамшуулахаа илэрхийлсэн байна. Олимпын мөнгөн медальт ОУХМ Б.Баасанхүүд 50 мянган ам.доллар, түүний дасгалжуулагч нарт 30 сая төгрөгийн урамшууллыг тус тус бэлнээр олгож, спортын түүхэнд гаргасан бахдам амжилтыг нь сайшааж, урамшууллаа.

          “Парис 2024” олимпын мөнгөн медальт ОУХМ Б.Баасанхүү хэлэхдээ: “Миний өнөөдрийн гаргасан амжилт "Макс” групптэй салшгүй холбоотой. Миний спортын гараа "Макс” группийн нэрэмжит “Макс цом-2013” жүдо бөхийн өсвөрийн тэмцээнд оролцож, анхны хүрэл медалиа хүртэж байснаар эхэлсэн. Түүнээс хойш 11 жилийн дараа “Парис-2024” оны олимпод мөнгөн медаль хүртлээ. Ийнхүү хөдөлмөр зүтгэлээ үнэлүүлэн 50 мянган ам.долларын шагналыг “Макс” группийн удирдлагуудаасаа хүртэж байгаадаа маш их баяртай байна. Мөн миний амжилт бүрийн ард хамтдаа зүтгэж буй дасгалжуулагч нарт 30 сая төгрөгийн мөнгөн урамшуулал өгсөнд маш их талархаж байна. Цаашид 2028 оны олимпын наадамд гаргасан амжилтаа ахиулан гэдэгтээ итгэлтэй байна”  гэлээ.