Олон улсын хүүхдийн спортын Х наадмын нээлтийн ёслол өнөөдөр болж, Монгол, ОХУ, БНХАУ-ын өсвөрийн тамирчид хуран чууллаа. Наадмын бамбарыг боксын залуучуудын улсын аварга, өсвөр үеийнхний улсын аварга Э.Төгс-Эрдэнэ асаасан нь  хамгийн оргил мөч байлаа. Энэ удаагийн наадамд Монгол, ОХУ, БНХАУ-ын 460 тамирчин спортын есөн төрөлд 525 багц медалийн төлөө өрсөлдөнө.

           Наадмын нээлтийн эхэнд Биеийн тамир, спортын улсын хорооны дарга О.Баттулга тус наадмыг нээж хэлсэн үгэндээ “Эрхэм хүндэт зочид, тамирчин, дасгалжуулагчидаа мөнх хөх тэнгэрийн Монгол оронд минь тавтай морилно уу. 2009 оноос эхлэн олон улсын хүүхдийн спортын наадмыг гурван улсад ээлжлэн зохион байгуулдаг болсон билээ. Өнөө жил Монгол улсад дөрөв дэх удаагаа зохион байгуулж байна.

          Монгол Улс энэхүү наадмыг зохион байгуулах үүргээ биелүүлэн Засгийн газрын 2024 оны 64 дүгээр тогтоолын дагуу зохион байгуулах бэлтгэл ажлаа ханган гурван орны 466 өсвөрийн тамирчид спортын есөн төрлөөр өрсөлдөхөд бэлэн болсон байна. Ирээдүйд тив, дэлхий, олимпын аваргууд болох өсвөрийн тамирчдадаа өндрөөс өндөр амжилт хүсье” хэмээн онцоллоо.