“Парис-2024” зуны олимпын наадмын чөлөөт болон сонгомол барилдаан өчигдөр эхэлсэн. Манай улсаас эмэгтэйчүүдийн 68 кг-д “Белград-2023” дэлхийн аварга шалгаруулах тэмцээний мөнгөн медальт, Ази тивийн мөнгө, хүрэл медальт, ЦЕГ-ын “Хүч” спорт хороо, Үндэсний шигшээ багийн тамирчин, ОУХМ Энхсайханы Дэлгэрмаа өрсөлдлөө. Манай бөх эхний даваанд олимпын хүрэл, дэлхийн аваргын алтан медальт Киргизстаны Мээрим Жаманзароватай учраа таарсан. ОУХМ Э.Дэлгэрмаа Киргизстан Улсын бөх Мээрим Жаманзароватай барилдаж, 3:8-ын харьцаатай ялагдлаа.  Мээрим Жаманзарова, Японы бөх дэлхийн хошой аваргыг ялсан. Улмаар Нигерийн бөх олимпын мөнгөн медальт Блессинг Оборудудуг ялж финалд шалгарлаа. Ингэснээр манай тамирчин Э.Дэлгэрмаа өнөөдөр дэлхийн хошой аварга Японы Озакэ Нонокатай дагах барилдаан хийнэ.