"Парис 2024" зуны XXXIII олимпын наадмын боксын эмэгтэйчүүдийн 54 кг-ын жинд өрсөлдөж буй ДАШТ-ий хүрэл медальт, Үндэсний шигшээ багийн тамирчин, ОУХМ М.Энхжаргал өнөөдөр дэлхийн аварга, Туркийн боксчин Хатиче Акбаштай хүрэл медалийн төлөө тулалдах билээ. Тэрбээр эхний тулаандаа Италийн тамирчныг төвөггүй буулган авсан. Шөвгийн 16-д Румыны тамирчин, 32 настай, 2022 оны ДАШТ-ний мөнгөн медальт, 2024 оны Европын аварга шалгаруулах тэмцээний мөнгөн медальт Ленута Лекрамиоараг илүүрхсэн юм.

       Харин түүнтэй олимпын  хүрэл медалийн төлөө тулалдах Туркийн тамирчин Хатиче Акбаши нь 2022 онд эх орондоо болсон ДАШТ-ээс алтан медаль хүртэж, Ази тивдээ аваргалсан амаргүй тамирчин байгаа. Тэд өнөөдөр 23:20 цагт шийдвэрлэх тулаан хийнэ. Хэн ялсан нь медалийн тавцанд гарч, ялагдсан нь эх орондоо медальгүй буцах юм. Хэрэв М.Энхжаргал өрсөлдөгчөө ялсан тохиолдолд олимпын наадмаас медаль хүртсэн Монголын боксын найм дахь тамирчин, Монголын анхны олимпын медальтай эмэгтэй боксчин болно.

Олимпын их наадмаас медаль хүртсэн  Монголын боксчдыг танилцуулбал :

"Сөүл-1988" олимпоос Н.Энхбат хүрэл медаль.

"Барселона-1992" олимпоос Н.Баярсайхан хүрэл медаль.

"Бээжин-2008" олимпоос П.Сэрдамба мөнгөн медаль.

"Бээжин-2008" олимпоос Э.Бадар-Ууган алт медаль.

"Лондон-2012" олимпоос У.Мөнх-Эрдэнэ хүрэл медаль.

"Лондон-2012" олимпоос Н.Төгсцогт мөнгөн медаль.

"Рио-2016" олимпоос Д.Отгондалай хүрэл медаль тус тус аваад байгаа.