“Парис-2024” зуны олимпын наадам өчигдөр гурав дахь өдрөө үргэлжилж өндөрлөв. Өчидөр манай улсын хоёр жүдочин дагах барилдаанд хүч үзэв. Эмэгтэйчүүдийн 57 кг-ын жингийн дагах тойрогт ДАШТ-ий хошой хүрэл медальт, гавьяат тамирчин Л.Энхрийлэн Гүржийн бөхөд ялагдсан бол эрэгтэйчүүдийн 73 кг-ын жингийн дагах тойргийн барилдаанд ОУХМ Б.Эрдэнэбаяр Японы жүдочин дэлхийн аварга Хашимотод ялагдсанаар тэд тэмцээнээ өндөрлүүлсэн. Өчигдөр явагдсан 57, 73 кг-ын жинд Монгол тамирчид өмнө нь олимпын наадмаас медаль хүртэж байсан. МУГТ  Д.Сумъяа “Рио-2016” олимпын 57 кг-д мөнгөн медаль, МУГТ С.Ням-Очир “Лондон-2012” олимпын 73 кг-д хүрэл медаль, МУГТ Ц.Цогтбаатар “Токио-2020” олимпын  73 кг-ын жинд хүрэл медаль хүртэж байсан билээ.

“Парис 2024” олимпын 57 кг-ын жингийн эхний тойрогт  МУГТ Л.Энхрийлэн “Токио 2020” олимпын аварга, Косово Улсын жүдочин Нора Гжаковаг төвөггүй ялсан нь бахдам амжилт байлаа. Хоёрдугаар тойрогт Германы хүчтэй өрсөлдөгч Паулине Штаркег ялсан. “С” хэсгийн аваргын төлөөх барилдаанд  урд нь ДАШТ-д хоёр удаа таарч ялж байсан Өмнөд Солонгосын дэлхийн аварга Хух Мимид ялагдсан. Улмаар дагах тойргийн барилдаанд Гүржийн Этери Липартелианид хожигдож долдугаар байраар олимпын тэмцээнээ өндөрлүүллээ.

Эрэгтэйчүүдийн 73 кг-ын жинд ОУХМ  Б.Эрдэнэбаяр 2023 оны дэлхийн аварга, энэ онд ДАШТ-д манай Л. Анхзаяад ялагдсан Швейцарийн Нилс Штамп аваргыг ялсан. Хоёрдугаар тойрогт Испанийн  Салвадор Касес Росаг буулган авсан. Улмаар “D” хэсгийн аваргын төлөөх барилдаанд Молдавын Адил Османовт эргэлзээтэй байдлаар ялагдсан. Шүүгчид Б.Эрдэнэбаярын хийсэн мэхэнд үнэлгээ өгөөгүй нь үнэхээр хачирхалтай байв. Шөвгийн дөрөвт  Францын жүдочин Жоан Бенжамин  Габаг сул өрсөлдөгчтэй тааруулах гэсэн юм биш байгаа гэсэн хардлагыг төрүүлсэн шүүлтийг хийлээ. Б.Эрдэнэбаяр дагах тойрогт дэлхийн аварга Японы жүдочин  Сойчи Хашимотог ялсан шүү. Шүүгчид  мэх хийж үнэлгээ авсан манай бөхөд, мэхэнд унаж, ялагдал хүлээсэн Японы бөхөд ялалтыг өгсөн нь харамсалтай байлаа. Толгойгоороо зоогдож унасан уу, шанаагаар нидэрч унав уу гэдэг бас л эргэлзээтэй. Ийнхүү өчигдөр барилдсан МУГТ Л.Энхрийлэн, ОУХМ Б.Эрдэнэбаяр нар боломжийн сайн л барилдсан.

Гэхдээ шүүгчид арай л сонин шүүх юм. Жижиг буурай орны тамирчдыг маш хурдан торгох юм. Япон, Франц, Герман, Бразилын бөхчүүдэд бараг л торгууль өгөхгүй талдаа байна шүү.