“Парис-2024” зуны олимпын наадам гурав дахь өдрөө өнөөдөр үргэлжилнэ. Монголын багаас энэ өдрүүдэд бокс, жүдо, буудлага, усанд сэлэлт, дугуй, байт харваа гэсэн төрлүүдээр тамирчид маань хурд, хүчээ үзэж байгаа бөгөөд боксоос нэг, жүдогоос дөрвөн тамирчин өрсөлдөөнөө өндөрлүүллээ. Үлдсэн өдрүүдэд чөлөөт бөх, хөнгөн атлетик, хүндийн өргөлтийн төрлөөр Монголын тамирчид өрсөлдөнө. Монгол Улсын баг тус олимпын наадамд 32 тамирчнаа сойсон бөгөөд олимпын эрх авсан тамирчдын тоогоороо Ази тивийн 25 орноос 11 дүгээр байрт бичигджээ. Жагсаалтын эхэнд Япон Улсын баг 403 тамирчнаа олимпын наадамд оролцуулснаар тэргүүлж байна.