Чөлөөт бөхийн 2024 оны УАШТ-ий 70 кг-ын жингийн аварга, зэвсэгт хүчний “Алдар” спорт хорооны тамирчин, ОУХМ Цэрмаагийн Чинзориг 1996 оны энэ өдөр мэндэлжээ. Тэрбээр улсын аваргын эрэгтэйчүүдийн 70 кг-ын жинд алтан медальтай. Мөн “U23” хүртэлх насны Ази тивийн аварга шалгаруулах тэмцээний хүрэл, цэргийн ДАШТ-ээс хүрэл медаль хүртэж байсан билээ.

       Түүний ахыг Ц.Чингис гэдэг. Тийм болохоор найз нар нь Ц.Чинзоригийг Чинзоо гэхээсээ илүүтэйгээр “Өгэдэй” хэмээн өхөөрдөн дууддаг. Мэдэхгүй хүмүүс түүний нэрийг Өгэдэй гэж эндүүрэх нь бий. ОУХМ Ц.Чинзориг 2021 онд Монгол Улсын аваргад 61 кг-ын жинд түрүүлж, УАШТ-ий “Үнэ цэнтэй тамирчин” гэдэг шагналыг хүртэж байсан билээ.  УАШТ-д түрүүлсний дараагаар АНУ-ын коллежийн “NJCAA” холбоонд нэг жилийн гэрээтэй барилдсан. Тэгээд АНУ-ын коллежийн аварга болоод тэр холбооны “Хамгийн үнэ цэнтэй тамирчин”-ын шагналаар давхар шагнуулж байлаа.