Тулгар төрийн 2233 жил, Их Монгол Улсын 818 жил, Үндэсний эрх чөлөө, тусгаар тогтнолоо сэргээн мандуулсны 113, Ардын хувьсгалын 103 жилийн ойг тохиолдуулан Монгол Чөлөөт бөхийн холбооноос нэр бүхий эрхмүүдэд төрийн дээд одон, медаль хүртээлээ. Шагналыг Монголын чөлөөт бөхийн холбооны удирдах зөвлөлийн гишүүн, Үндсэн хуулийн цэцийн дарга Г.Баясгалан гардууллаа.

       МУГТ Оюунбилэгийн Пүрэвбаатарыг “Хөдөлмөрийн гавьяаны улаан тугийн одон”-оор шагнав. Тэрбээр 1987 оноос эхлэн чөлөөт бөхийн спортоор хичээллэж 1993-2007 онд Үндэсний шигшээ багийн тамирчин, 2007-2012 онд “Олимп” сургуулийн багш, дасгалжуулагч, 2012-2016 онд Үндэсний шигшээ багийн дасгалжуулагчаар ажилласан. ДАШТ-ий хошой мөнгө, Азийн наадмын аварга, Ази тивийн аварга, Зүүн Азийн наадмын аварга, Дэлхийн цомын аваргын хүрэл, олон улсын гран при тэмцээний 10 удаагийн аварга, Монгол Улсын гавьяат тамирчин юм.

      Адуучийн Баасанхүүг мөн “Хөдөлмөрийн гавьяаны улаан тугийн одон”-оор шагнав. Тэрбээр 1989 оноос эхлэн бөхийн чөлөөт барилдааны шүүгчээр ажиллаж 1991 онд улсын шүүгч, 1992, 1994, 1995 онуудад олон улсын III, II, I зэргийн шүүгч болж, улмаар 1996 онд “Олон улсын шилэгдмэл шүүгч”-ийн шагналтай. Дэлхийн аварга шалгаруулах тэмцээнд 10,  дэлхийн болон тивийн цомын тэмцээнд дөрөв, Азийн наадам ба Азийн аварга шалгаруулах тэмцээнд 16, дэлхийн хүүхдийн наадамд буюу Зүүн Азийн наадамд хоёр удаа тус тус шүүгчээр ажиллаж байв.

        Бямбажавын Жавхлантөгсийг “Хөдөлмөрийн гавьяаны улаан тугийн одон”-оор шагнав. Тэрбээр бөхийн чөлөөт барилдааны Монгол Улсын аваргаар 1977, 1978, 1980, 1981, 1982 онуудад 48 кг-д нэг удаа 52 кг-д дөрвөн удаа шалгарч байсан. Эх спортоор хичээллэх хугацаандаа олон улс, улс, хотын чанартай тэмцээнүүдээс 50 гаруй медаль хүртэж, 1979, 1981, 1982 оны дэлхийн аваргын тэмцээнд оролцож байжээ.

       Цэрэнбалтав Даваабундыг “Алтан гадас” одонгоор- Монгол Улсын нийслэл Улаанбаатар хотноо 2001 онд зохиогдсон насанд хүрэгчдийн Ази тивийн аварга шалгаруулах тэмцээнээс хүрэл медаль хүртэж, Монголын чөлөөт бөхийн эмэгтэй тамирчдын тивийн аваргын анхны медалийг эх орондоо авчирч байжээ. Тэрбээр тамирчин хүний тэсвэр хатуужлыг үеийнхээ тамирчдад үлгэрлэн эх орныхоо нэрийг олон улсын тавцанд өргөхөд жинтэй хувь нэмэр оруулсан тамирчин юм.