Тулгар төр үүсгэн байгуулагдсны 2233, Их Монгол Улс үүсгэн байгуулагдсны 818, Үндэсний эрх чөлөө тусгаар тогтнолоо сэргээн мандуулсны 113, Ардын хувьсгалын 103 жилийн ойн үндэсний их баяр наадмын хязаалан насны хурдан морьд бариандаа орсон. Харин хязаалан морьдын уралдааны үеэр унаач хүүхэд мориноосоо унасан гэх мэдээлэл бий. Тэгвэл үүнтэй холбогдуулан Хурдан морины салбар комиссоос сэтгүүлчдэд мэдээлэл өглөө.

        Энэ талаар Хурдан морины салбар комиссын орлогч дарга Б.Ганбаатар “Үндэсний их баяр наадмын хурдан хязаалан насны уралдаанд 256 хязаалан бүртгүүлснээс гарааны зурхайд 156 үрээ гарч уралдав. Бүртгүүлсэн 256 хязаалангаас73 нь сэрвээний өндрөөр, 11 шүдээр хүрээгүй бөгөөд 23 адуу бүртгүүлсэн ч ирж уралдаагүй.

       Мөн хурдан морины унаач хүүхдүүдийн эрүүл мэндийн асуудалд онцгойлон анхаарч, хамгаалах хэрэгслийг бүрэн өмсгөж, сайтар шалгаж оруулж байна. Харин хязаалан насны морьдын уралдааны үеэр долоон унаач хүүхэд мориноосоо унасан. Морьд гараанаас гарахад л гурван хүүхэд унасан. Гэхдээ унаач хүүхдүүдийг эрүүл мэндийн үзлэгт оруулахад ноцтой бэртэж, гэмтсэн зүйл байхгүй байсан учир буцааж морин дээр нь мордуулж уралдуулсан байна” гэв.