Монголын Үндэсний бөхийн холбооны Допингийн хэргийг хянан шийдвэрлэх хараат бус комисс өнөөдөр хуралдаж, улсын арслан Э.Оюунболдыг улсын баяр наадмаар барилдуулах эсэхийг хянан хэлэлцэж шийдвэр гаргана. Тус комисс 17.00 цагт шийдвэрээ танилцуулахаар төлөвлөжээ. Улсын баяр наадамд барилдах бөхчүүдийн бүртгэл өнөөдөр 18.00 цагаас хаагдах юм

      Барилдах эрхээ найман жилээр хасуулсан улсын арслан Э.Оюунболд Монгол Улс дахь Олон улсын ба үндэсний спортын арбитрт нэхэмжлэл гаргажээ. Түүний шаардлагыг Монгол дахь Олон улсын ба үндэсний спортын арбитрын давж заалдах комисс хүлээн авсан байна. Улмаар Үндэсний их баяр наадмын бөхийн салбар хорооноос түүний маргааныг Монголын үндэсний бөхийн холбоо болон эрх бүхий комисс шийднэ гэсний дагуу ийнхүү өнөөдөр хуралдахаар болжээ. 

Допингийн хэргийг хянан шийдвэрлэх хараат бус комиссыг Монголын үндэсний допингийн эсрэг байгууллага, Монголын олон улсын ба үндэсний спортын арбитр байгууллагын зөвлөснөөр байгуулжээ. Тус комисс нь Засгийн газраас 2022 онд баталсан Үндэсний допингийн эсрэг дүрмийн хүрээнд үйл ажиллагаа явуулах юм байна.

       Монголын Үндэсний бөхийн холбооны Допингийн хэргийг хянан шийдвэрлэх хараат бус комиссын даргаар хуульч П.Мөнхжаргал ажилладаг бол бүрэлдэхүүнд нь эмч О.Амгаланхүү, хуульч, өмгөөлөгч Ж.Эрдэнэбаяр, тамирчин Д.Золбаяр, эмч Д.Нямдорж нар багтдаг ажээ.