Тулгар төрийн 2233 жил, Их Монгол Улсын 818 жил, Үндэсний эрх чөлөө, тусгаар тогтнолоо сэргээн мандуулсны 113, Ардын хувьсгалын 103 жилийн ойг тохиолдуулан Монгол Улсын Ерөнхийлөгч У.Хүрэлсүх төрийн дээд цол, одон, медаль гардууллаа. Улсын шигшээ багийн тамирчнаар спортын замналаа эхлүүлж, Монгол Улсын бөхийн хөгжлийн төлөө тасралтгүй 60 гаруй жил хүчин зүтгэж яваа хүн бол МУГТ, Ардын багш Чимэдбазарын Дамдиншарав билээ.

      Тэрбээр тив, дэлхийн олон арван тэмцээнд амжилттай оролцож 20 гаруй медаль хүртсэнээс 1968 онд Мексик Улсын Мехико хотод зохион байгуулагдсан зуны олимпын XIX наадмын чөлөөт бөхийн 52 кг-ын жинд хүрэл медаль хүртэн Монгол Улсад олимпын анхны медалийг авчирч, эх орныхоо нэрийг дэлхийн тавцанд мандуулсан юм. Мөн бөхийн шинэ залуу үеийн дасгалжуулагчид, олон зуун шилдэг тамирчдыг бэлтгэхэд мэдлэг, чадвараа дайчлан ажиллаж Монгол Улсад бөхийн спортыг хөгжүүлэхэд оруулсан жинтэй хувь нэмрийг нь өндрөөр үнэлэн “Хангайн хүчтэн” дэвжээний зөвлөх дасгалжуулагч, Монгол Улсын Ардын багш, Гавьяат тамирчин Чимэдбазарын Дамдиншаравт Монгол Улсын орчин цагийн спортын салбар үүсэж хөгжсөний түүхт 100 жилийн ойг тохиолдуулан Хөдөлмөрийн баатар цол хүртээж, Алтансоёмбот тэмдэг Сүхбаатарын одонгоор шагналаа.