Жүдо бөхийн Үндэсний шигшээ баг, “Алдар” спорт хорооны тамирчин ОУХМ Гантулгын  Алтанбагана 1995 оны энэ өдөр мэндэлжээ. Тэрбээр “Жакарта-2018” Азийн наадмаас мөнгөн медаль, “Нурсултан-2022” Азийн аварга шалгаруулах тэмцээнээс хүрэл, “Хонконг 2024” Азийн аваргаас мөнгөн медаль хүртэж байв.

          Олон улсын жүдо бөхийн холбоо,  “IJF”-ийн цуврал гранд сламаас нэг мөнгө, дөрвөн хүрэл, гран при тэмцээнээс нэг алт, гурван мөнгө, гурван хүрэл медаль хүртэж байсан, манай улсын 90 кг-ын жингийн шилдэг жүдочдын нэг юм. Г.Алтанбагана тэмцээндээ орохдоо арав гаруй килограмм хасдаг. Олон килограмм жин хасах нь түүний барилдаанд сөргөөр нөлөөлж, бэртэл, гэмтэл авах гол шалтгаан болчихоод байгаа. 2024 оны ДАШТ-д хуруугаа хугалж барилдаанаа бүрэн гаргаж чадаагүй өндөрлөсөн билээ.

         ОУХМ, Г.Алтанбагана Төв аймгийн Бүрэн сумын уугуул хэмээн явдаг.  Г. Алтанбагана Төв аймгийн баяр наадамд тав давж аймгийн начин цол хүртэж байсан. Төв аймгийн наадамд хоёрын даваанд улсын начин Б.Чимэдвандан, гуравт аймгийн хурц арслан О.Гантулга, дөрөвт улсын заан Ц.Баярсайхан, тавд улсын заан Д.Амгаланбаатар нарыг тус тус давж, аймгийн начин цол хүртсэн.