Өвөр Монголын өөртөө засах оронд ДБНХ, олон улсын бөхийн холбооноос зохион байгуулдаг “Барга цом”-ын аварга шалгаруулах олон улсын VI тэмцээн энэ сарын 19-ний өдөр Хөлөнбуйр хотод эхэлсэн. Тус тэмцээнд оролцож буй манай тамирчид эхний хоёр өдрийн дараах байдлаар гурван алт, хоёр мөнгө, дөрвөн хүрэл медаль хүртжээ.

        Олимпын зургаан жингээр зохион байгуулагдаж буй тус тэмцээн гурван өдрийн форматаар буюу өдөрт эрэгтэй, эмэгтэй тус бүр хоёр нийт дөрвөн жингийн барилдаанууд явагдаж байгаа юм. Тэмцээний эхний өдөр эрэгтэйчүүдийн 65, 125 кг, эмэгтэйчүүдийн 53, 57 кг-ын барилдаанууд болж манай баг тамирчид дөрвөн медаль хүртсэн байна.

       Эрэгтэйчүүдийн 65 кг-ын жинд нийт 21 тамирчин оролцоход “Цаст тайга” клубийн тамирчин Н.Ганбаяр алтан медаль, эмэгтэйчүүдийн 53 кг-д 14 тамирчин барилджээ. Тус жинд “Төгс” дэвжээний тамирчин Н.Түмэндэмбэрэл мөнгөн медаль, 57 кг-д 16 тамирчин барилдахад Хилийн цэргийн 0208 тусгай салбар, “Хилчин” спорт хорооны тамирчин ОУХМ Э.Сумъяа хүрэл медаль, “Хангай хайрхан-Уул” клубийн тамирчин Б.Энхтүвшин хүрэл медаль тус тус хүртсэн байна.

        Харин энэ сарын 20-ны өдөр эрэгтэйчүүдийн 57, 74 кг, эмэгтэйчүүдийн 62, 76 кг-ын жингийн шилдгүүд тодорлоо. Эрэгтэйчүүдийн 57 кг-д 10 тамирчин барилджээ. “Төгс” дэвжээний тамирчин Б.Мөнх-Эрдэнэ алтан медаль, “Дархан-Хасу Fohow” клубийн тамирчин П.Дашцэрэн хүрэл медаль, 74 кг-д нийт 40 тамирчин барилджээ. “Хилчин” спорт хороо, “Дархан-Хасу Fohow” клубийн тамирчин Э.Тэмүүлэн алтан медаль тус тус хүртжээ.

     Мөн эмэгтэйчүүдээс “Хилчин” спорт хороо, "Fohow MNU03" клубийн тамирчин З.Болортунгалаг мөнгөн медаль, “Хилчин” спорт хорооны тамирчин Н.Загардулам нар хүрэл медалийн эзэд болжээ. “Барга цом”-ын тэмцээнд оролцож буй Монголын баг тамирчид хоёр өдрийн дараах байдлаар эрэгтэй, эмэгтэй нийт найман жингээс есөн медаль хүртээд байна.

        Тэмцээн өнөөдөр эрэгтэйчүүдийн 86, 97 кг, эмэгтэйчүүдийн 50, 68 кг-ын жингийн барилдаанаар хаалтаа хийнэ. Дашрамд сонирхуулахад тус тэмцээнд БНХАУ-ын 20 муж, ӨМӨЗО, ОХУ-ын Буриад улс, Монгол Улсаас нийт 245 тамирчин оролцож байна.