Лондон 2012 олимпын наадмын хүрэл, ДАШТ-ний хошой хүрэл медальт, Азийн аварга, Зүүн Азийн наадмын аварга, дэлхийн цомын мөнгөн медальт, Монголын шилдэг ширэн бээлийтнүүдийн нэг У.Мөнх-Эрдэнэ билээ. Тэрбээр өдгөө тэмцээнд оролцохын зэрэгцээ өөрийн клубээ нээн, дасгалжуулагчаар ажиллаж байгаа аж. Монгол Улсын гавьяат тамирчин У.Мөнх-Эрдэнэтэй цөөн хором ярилцлаа.

-Таныг боксын  клуб нээсэн гэдгийг сонслоо. Клуб нээх бодол, мөрөөдөл хэдий үеэс бий болов. Зөвхөн өсвөр үеийнхэнд зориулсан клуб үү, бүх насныхан хичээллэх боломжтой юу?

      -Бокс миний дуртай спорт, хичээллэх дуртай зүйл. Клуб нээх бодол мөрөөдөл бол урьд өмнө огтхон байгаагүй. Сүүлийн үед клуб нээх бодол төрсөн. Манай клубт өсвөр үе, залуучууд, насанд хүрэгчид гээд бүх насны хүмүүст нээлттэй. Насны ямар нэгэн хязгаар, цензур байхгүй. Гол нь боксын спортоор хичээллэх хүсэл, сонирхол, тэмүүлэлтэй байх ёстой.

-Танай клуб зөвхөн боксоор дагнаж байгаа юу. Танай клубт өөрөөс тань гадна боксын багш, дасгалжуулагч хэр олон байгаа вэ?

       -Манай клубийн 50 хувь нь бокс, 50 хувь нь фитнес тоног төхөөрөмжтэй. Зөвхөн бокс гэлтгүй фитнес гэж ойлгож болно. Манай клубт надаас гадна ОУХМ Н.Баяраа, спортын мастер Есүхэйбаатар нар дасгалжуулагч, багшаар ажиллаж байгаа.

-Клубийн зорилго, алс хэтийн зорилт нь юу вэ?

        -Манай клубийн гол зорилго хүүхэд залууст боксын спортыг зөв ойлгуулж, таниулах иргэдэд спортоор хичээллэхэд нь туслах. Өөрийн сурсан зүйл,  26 жилийн туршлагаараа өөрөөсөө илүү тамирчин бэлтгэхийн төлөө хичээнэ. Монгол хүүхдүүд авьяастай. Тэдний суурийг зөв тавьж, чиглүүлж өгвөл амжилт гаргана. Өөрийн эрүүл, мэнд, бие бялдрын хөгжлийг дээшлүүлэх  хүүхэд, залууст манай клубийн үүд хаалга нээлттэй.

-Та зодог тайлаагүй байгаа. Хэдэн нас хүртлээ боксоор тулалдах вэ?

        - Хүний нөөц, боломжид хязгаар гэж үгүй. 

-Тамирчны цаг, завгүй хүнд бэлтгэлийн хажуугаар давхар дасгалжуулагчаар, тэр тусмаа өсвөрийн тамирчидтай ажиллана гэдэг амаргүй. Энэ бүхнийг хэрхэн зохицуулж байна вэ?

       -Сүүлийн жилүүдэд бэлтгэлийг хуучин шигээ хийж арай л амжихгүй байна. Гэхдээ удахгүй бага багаар бэлтгэлээ эрчимжүүлсээр формдоо орчих байх аа.

-Зодог тайлсны чинь дараа Боксын улсын шигшээ багийн дасгалжуулагчаар ажиллах санал тавивал та ажиллах уу?

        -Ер нь энэ талаар огт бодож явсангүй.

-Та Лондон 2012 олимпын наадмын хүрэл, Милан 2009, Алмата 2013 дэлхийн аварга шалгаруулах тэмцээнээс хүрэл медаль хүртсэн.  Тэр үед мэргэжлийн бокс руу орж тулалдах бодолд төрөөгүй юу?

      -Миний хүүхэд насны мөрөөдөл бокс байсан. Багаасаа хичээллэсэн энэ спортдоо илүү дуртай. Миний хувьд олимпын бокс илүү сонирхолтой санагддаг. 

-Та 12 настай байхдаа боксоор хичээллэсэн гэдэг. Ер нь яагаад эрсдэлтэй сонирхогчдын боксыг сонгох болов?

    -Би 14 настай байх үеэсээ сонирхогчдын боксоор хичээллэж эхэлсэн. Боксыг хэзээ ч эрсдэл өндөртэй спорт гэж харж байсангүй.