Дархан-Уул аймгийн Засаг даргын ивээл дор зохион байгуулагдаж байгаа АБТА, БТТА, Спортын мастер Цэрэнжавын Жигдэн агсны нэрэмжит чөлөөт бөхийн барилдааны өсвөр үеийн олон хотын тэмцээн тус аймгийн Спортын ордонд болж өндөрлөв. Энэ удаагийн тэмцээнд 28 байгууллагын 557 тамирчин охид, хөвгүүдийн 22 жинд 90 багц медалийн төлөө хүч сорьсон юм.

   Тус тэмцээнд багийн нэгдсэн дүнгээр спортын мастер Ё.Батдархан, У.Оюунбаяр дасгалжуулагчтай “Дархан-Эрхэт” баг 80 оноогоор тэргүүлж, ОУХМ Л.Энхбаяр дасгалжуулагчтай Төв аймгийн баг 79 оноогоор удаалж, ОУХМ Д.Гомбодорж дасгалжуулагчтай Спортын төв сургууль 54 оноогоор гуравдугаар байрт орлоо.

    Тэмцээний “Шилдэг эрэгтэй тамирчин”-аар Т.Жанчивдорж “Дархан-Эрхэт”, “Шилдэг эмэгтэй тамирчин”-аар Сэлэнгэ аймгийн М.Баясгалан, “Өсөх ирээдүйтэй тамирчин”-аар “Төгс” клубийн А.Ариунзул, “Шилдэг дасгалжуулагч”-аар Спортын төв сургуулийн багш Г.Нямбаяр, “Шилдэг шүүгч”-ээр Э.Батнасан нар тодров.