Европын монголчуудын волейболын аварга шалгаруулах “EURO 2022”  найм дахь удаагийн тэмцээн Швейцарийн холбооны Улсын Женев хотноо есдүгээр сарын 24-25-ны өдрүүдэд амжилттай явагдаж өндөрлөв.Энэ удаагийн тэмцээнд Англи, Австри, Бельги, Герман, Испани, Ирланд, Франц, Словак, Чех, Швед, Европын холбоо, Финланд, Швейцарь улсуудаас хүрэлцэн ирсэн 37 багийн 340 гаруй тамирчин оролцож хоёр өдрийн турш хурд, хүч, авъяас чадвараараа өрсөлдөн аваргуудаа тодрууллаа.

    Эрэгтэй мастер ангиллын тэргүүн байрыг  Швед Улсын "Илч" баг, хоёрдугаар байрт Ирланд Улсын "MGL IRELAND" баг, гуравдугаар байрт ХБНГУ-ын "TSOG BERLIN" баг орлоо. Харин эмэгтэй мастер ангиллын тэргүүн байрыг ХБНГУ-ын "TSOG 2" баг, хоёрдугаар байрт Швейцарь Улсын "EDELWEISS" баг, гуравдугаар байрт Европын холбооны "MGL" баг тус тус шалгарлаа.

   Эрэгтэй насанд хүрэгчдийн ангиллын тэргүүн байрт Ирланд Улсын "MGL IRELAND" баг, хоёрдугаар байрт Бельги Улсын "BELGIUM" баг, гуравдугаар байрт Чех Улсын "TIGERS" баг шалгарав. Эмэгтэй насанд хүрэгсдийн ангиллын нэгдүгээр байрт Австри Улсын "CLUB WIN" баг, хоёрдугаар байрт Финланд ба холимог улсын "ИРЭЭДҮЙ" баг, гуравдугаар байрт Ирланд Улсын "MGL IRELAND" баг тус тус шалгарлаа.

    Эрэгтэй мастер ангиллын “Шилдэг тоглогч”-оор Швед Улсын "ИЛЧ" багийн Г.Сэр-Од, “”Шилдэг холбогч”-оор Ирланд Улсын "MGL IRELAND" багийн Б.Анхбаяр шалгарсан юм. Эмэгтэй мастер ангиллын “Шилдэг холбогч”-оор Швейцарь Улсын "EDELWEISS" багийн С.Сувд, “Шилдэг тоглогч”-оор ХБНГУ-ын "TSOG 2" багийн Ж.Дуламсүрэн нар шалгарав.

     Эрэгтэй насанд хүрэгсдийн ангиллын “Шилдэг тоглогч”-оор Ирланд Улсын “MGL IRELAND” багийн Э.Энх-Эрдэнэ, “Шилдэг холбогч”-оор Бельги Улсын “BELGIUM” багийн Н.Золмандах шалгарсан. Эмэгтэй насанд хүрэгсдийн ангиллын “Шилдэг тоглогч”-оор Финланд ба холимог улсын “ИРЭЭДҮЙ” багийн Б.Сэлэнгэ, “Шилдэг холбогч”-оор Австри Улсын “CLUB WIN” багийн Л.Отгондаваа нар тус тус шалгарлаа.

    Тус тэмцээний тэргүүн байрт шалгарсан багууд аваргын цом, алтан медаль, өргөмжлөл, мөнгөн шагнал, хоёр, гуравдугаар байрт шалгарсан багууд мөнгө, хүрэл медаль, өргөмжлөл, мөнгөн шагналыг хүртэв. Тэмцээний ерөнхий зохион байгуулагчаар Швейцарийн монголчуудын “GM-STAR” спорт клуб ажилласан бол Монгол Улсаас Швейцарийн холбооны Улсад суугаа ЭСЯ, Байнгын төлөөлөгчийн газар, Монголын Волейболын холбоо, Швейцарь, Монголын нийгэмлэг, Монголын Волейболын холбооны Европ дахь салбар холбоо, “Натур Мед Ноён” спорт клуб хамтран зохион байгуулагчаар ажиллалаа.