Орос, Украины дайнтай холбоотойгоор оросын тамирчдыг тэмцээн уралдаанаас хасаж байсан бол нэгэн эсрэг шийдвэр гарчээ. Олон улсын сонирхогчдын боксын холбооноос “IBA” Украины боксын холбооны гишүүнчлэлийг зогсоож байгаагаа зарлалаа. Шалтгаан нь тус улсад төрөөс боксын холбооныхоо ажилд хутгалддаг явдал газар авсан гэж заажээ.

     2021 оны арванхоёрдугаар сарын 17-нд болсон Украины боксын холбооны тэргүүний сонгуульд Украины засгийн газар шууд нөлөөлсөн гэж  “IBA” үзсэн байна. Гэхдээ украин тамирчдыг боксын тэмцээнд оролцуулахын төлөө арга хэмжээ авна гэж тус холбооноос мэдэгджээ.

     Олон улсын сонирхогчдын боксын холбооны “IBA” ерөнхийлөгч нь ОХУ-ын иргэн Умар Кремлев аж. Энэ сарын 25-нд Ереванд IBA-гийн ээлжит бус чуулган болно. Чуулганаар Олон улсын сонирхогчдын боксын холбоо “IBA”-ын  ерөнхийлөгчийн сонгуулийн талаар хэлэлцэх юм.