• Өнөөдөр 2026-06-29

БАЯР ХҮРГЭЕ, М.ЛХАГВАГЭРЭЛ ЭЭ, ОДОО ДАШТ-ЭЭС АЛТ АВАХ Л ҮЛДЛЭЭ

2022-09-17,   724

    Манай тамирчид Дэлхийн аварга шалгаруулах тэмцээнд мөн ч өнгөтэй байна даа. Өчигдөр гэхэд л ОХУМ М.Лхагвагэрэл мөнгөн медаль хүртлээ. Түүний олон сар, өдрийн хөдөлмөр ийн биелэлээ олж, үр дүнгээ өглөө. Завханчууд мөн нэгэн тамирчнаараа бахархаж, уухайлан сууна.
 
     Хараад байхад, М.Лхагвагэрэлд хүч тамираас гадна ганхашгүй төвлөрөлт, сэтгэл зүйн хат байх шиг. Түүнийг барилдааны үзсэн хэн бүхэн анзаарсан байх. Нөгөө талаар монгол бөхийн өнгө аяс, дүн нуруу бүрэн шингэжээ. Энэ нь түүний бөхөөр барилдаж байсантай нь холбоотой. Магад тэр нухацтай их төвлөрөлт, хатаараа л медалийн болзол хангаж чадсан байх.
 
    М.Лхагвагэрэл нь Завхан аймгийн Яруу сумын уугуул тамирчин бөгөөд Үндэсний бөхийн улсын заан цолтой. 2021 онд Норвегийн Осло хотод зохиогдсон чөлөөт бөхийн Дэлхийн аварга шалгаруулах тэмцээний 125 кг-ийн жинд хүрэл медаль хүртсэн. Мөн Токио 2020 олимпод тавдугаар байрт шалгарч байсныг уншигч та санаж байгаа байх.
 
     Бөхийн амжилт гэвэл тоймгүй олон.  2017 онд Завхан аймгийн баяр наадамд зургаа давж, шөвгөрөн аймгийн харцага цол хүртсэн байдаг. Харин дараа жил нь мөн Завхан аймгийн баяр наадамд аймгийн заан П.Өсөхбаатарт өвдөг шороодон үзүүрлэж, аймгийн заан цол хүртсэн. Харин 2019 онд мөн аймгийнхаа баяр наадамд өлзийт начин М.Амарсанаад өвдөг шороодон үзүүрлэж, заан цолоо баталж, чимэг нэмсэн байдаг. Цэргийн хурц арслан цолтой. Харин энэ жилийн улсын баяр наадамд аймгийн хурц арслан У.Берекегээр дөрөв, улсын харцага Ш.Пүрэвгарьдаар тав, улсын гарьд Б.Гончигдамбаар зургаа, улсын харцага Б.Зоригтбаатараар долоо давж, Монгол Улсын заан цол хүртсэн юм.
 
     Өдгөө 24 настай залуухан тамирчин тэрбээр чамгүй амжилтыг монгол бөх болон чөлөөт бөхийн төрөлд гаргаж явна. Өнгөрсөн жил Дэлхийн аварга шалгаруулах тэмцээнээс хүрэл медаль хүртэж ирээд “Би өмнө нь дэлхийн дэвжээнээс медаль авахыг, шагналын тавцанд зогсохыг, дэлхийн медальтан болоод эх орондоо ирэхийг мөрөөддөг байсан. Түүндээ хүрлээ. Дэлхийн медальтан болж ирээд аавдаа үнсүүлэх хамгийн сайхан байлаа” хэмээн ярьсан байдаг. Ийм нэг дотортой, нөөцтэй, асар их сэтгэлийн хат, гүн төвлөрөлтэй тамирчин бол тэр билээ. Түүнд дахин баяр хүргэе. Дараа жил Дэлхийн аварга шалгаруулах тэмцээнээс алт, тэгээд олимпын аварга болохыг ерөөе. 
 

БАЯР ХҮРГЭЕ, М.ЛХАГВАГЭРЭЛ ЭЭ, ОДОО ДАШТ-ЭЭС АЛТ АВАХ Л ҮЛДЛЭЭ
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2026 © Зохиогчийн эрх хуулиар хамгаалагдсан. Мэдээлэл хуулбарлах хориотой.