• Өнөөдөр 2025-03-05

ОУХМ Д.Отгонжаргалын аав А.ГАНБААТАР: Охин минь С.Батцэцэг шиг бөх болно гэдэг юм

2022-09-15,   1062

        Дэлхийн аварга шалгаруулах тэмцээний мөнгө, хүрэл медальт, “Женко” клубийн тамирчин ОУХМ Д.Отгонжаргалын аав А.Ганбаатартай ярилцлаа.

 -Таны охин Д.Отгонжаргал ДАШТ-ээс хоёр дахь медалиа хүртлээ. Өмнөх жил хүрэл медаль хүртсэн бол энэ удаа медалийнхаа өнгийг хувиргаж, мөнгөн медалийн эзэн боллоо. Та барилдааныг нь үзсэн биз дээ?
 
     -Харин тийм ээ, охиныхоо барилдахыг хүлээж, тэсэн ядан суулаа. Барилдааныг нь 00:00 цагт үзсэн. Хэлэх ч үг олдохгүй юм. Гэрийнхэн, манай хамаатан садангууд цуглаад бөөндөө, сэтгэл догдлолтой үзсэн. Үнэхээр сайхан байлаа шүү. Японы бөх үнэхээр эрэмгий дайчин юм. Аргагүй л байхдаа, олимп, дэлхийн аварга бөхийн зангараг, туршлага байлгүй яахав. Гэхдээ энэ ялагдал охинд маань том туршлага хуримтлуулах үндэс болох байх. Дараа олон удаа түүнтэй таарч барилдах нь дамжиггүй. 
 
-Тэмцээний дараа тантай холбогдож ярьсан уу?
 
      -Ээжтэйгээ холбогдож ярих байх. Надтай одоогоор холбогдож амжаагүй л байна. Миний утасны сүлжээ өчигдөр унаад, ярих боломжгүй байлаа. Хүмүүс над руу залгаад “Утас чинь яагаад болохгүй байгаа юм бэ” гээд л байна. Охин маань дэлхийн аваргаас хүрэл, мөнгөн медалийг жил дараалан хүртлээ. Энэ том амжилтыг төр засаг үнэлэх байлгүй дээ. Дэлхийн аваргын мөнгөн медалийг чамлаж болохгүй. Хүсээд ч олдоггүй медаль шүү. Хүн ялж, ялагдаж байж аварга болдог юм. Яах вэ, зүгээрээ охин минь чи чадлаа.
 
-Д.Отгонжаргал хэдэн оноос чөлөөт бөхөөр хичээллэж байгаа вэ. Дүүтэйгээ цуг Т.Сүхбаатар багшийн секцэнд явдаг байсан юм уу?

     -Охин минь 2013 онд зургадугаар ангид байхдаа Т.Сүхбаатар багшийн удирдлага дор  чөлөөт бөхөөр хичээллэсэн. Дүүтэйгээ цуг Зурагтаас, Буянт-Ухаа ордон руу явж, чөлөөт бөхөөр хичээллэдэг байсан юм. Дүү нь бэртэл аваад барилдахгүй байгаа. Манайх долоон хүүхэдтэй. Зургаан охин, нэг хүүтэй. Отгонжаргал доороо хоёр дүүтэй. Миний охин дүү нараа өсгөсөн хүүхэд.

-Д.Отгонжаргалыг баруун гартаа нөж атгаж төрсөн хүүхэд гээд байдаг. Энэ үнэхээр үнэн юм уу? 
 
      -Тэр үнэн, үнэн. Ээж нь төрүүлсний дараа “Миний охин баруун гартаа нөж атгаж төрсөн шүү” гэж хэлж байсан. Ээжийнх нь тал бөхийн удамтай. Удмаа дагаад л бөх болсон болов уу.
 
 -Анх бөхийн секцэнд явах үед танай гэр бүлийнхэн, та хоёр хэр эсэргүүцэж байв уу?
 
       -Миний хувьд эсэргүүцэж хориглосон зүйл байгаагүй. Харин ээж нь тийм ч дуртай байгаагүй байх. Отгоо бага байхдаа “Би С.Батцэцэг эгч шиг сайн бөх болно” гээд Батцэцэгийг зурагтаар гарах үед зааж өгч билээ. С.Батцэцэг гавьяатын барилдааныг их үздэг. Ер нь бол Отгоогийн шүтэн биширдэг тамирчдынх нь нэг С.Батцэцэг юм. Т.Сүхбаатар, Б.Оюунсүрэн багшийн шавь болоод О.Насанбурмаа, О.Бурмаа, Б.Оюунсүрэн багшийнхаа барилдааныг үзэж, тэд нараас үлгэр дуурайлал авдаг болсон.
 
-Д.Отгонжаргал бага байхдаа ямар хүүхэд байв аа?
 
     -Их цовоо сэргэлэн хүүхэд. Их хурдан, хөдөлгөөнтэй, жижиг биедээ баймааргүй тэнхээтэй охин байлаа. Хоёр дүүгээ хоёр сугандаа хавчуулаад аваад явна. Хүнд их тусархуу, муу ааш зан байхгүй, дөлгөөн тайван хүүхэд. 

ОУХМ Д.Отгонжаргалын аав А.ГАНБААТАР: Охин минь С.Батцэцэг шиг бөх болно гэдэг юм
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 1
  • Сэтгэгдэл үлдээсэн: 2022-09-15 20:26:03
    Хунжав: Эхийн урагт хатсан нөж байтугай дусал цус байхгүй ариун тунгалаг байдаг болохоор энэ хүүхэд хаанаас хатсан нөж атгаж төрөх вэ Аав ээж хоёулаа худлаа хэлсэн байна
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2025 © Зохиогчийн эрх хуулиар хамгаалагдсан. Мэдээлэл хуулбарлах хориотой.