Монголын бүх ард түмний спортын наадмын сагсан бөмбөгийн 5х5 төрлийн шигшээ тэмцээн өндөрлөхөд хоёр хоног үлдлээ. Тэмцээн Спортын төв ордон болон ШУТИС-ийн зааланд болж байгаа бөгөөд хасагдах шатны тоглолт өндөрлөв. Өчигдрийн тоглолтод Орхон аймгийн тоглогч О.Батмагнай 35 оноо авсан нь хамгийн өндөр үзүүлэлт болсон.

  Тэр үүнээс гадна долоон самбараас бөмбөг авалт, хоёр оновчтой дамжуулалт өгснөөр тоглогчдыг тэргүүлсэн юм. Тэгвэл эмэгтэйчүүдээс Дорноговь аймгийн тамирчин Б.Болор-Эрдэнэ 32 оноо, 15 самбараас бөмбөг авалт, таван оновчтой дамжуулалт өгсөн нь энэ өдрийн хамгийн өндөр үзүүлэлт болов.

   Эрэгтэй багуудын тоглолтод Сүхбаатар аймаг, Төв аймаг 90-81, Орхон аймаг, Хэнтий аймаг 87-94, Баянзүрх дүүрэг, Дархан-Уул аймаг  93-84, Налайх дүүрэг, Баянгол дүүрэг 88-94-өөр тус тус өндөрлөв.

    Харин эмэгтэй багуудын тоглолтод Дорноговь аймаг, Завхан аймаг 76-82,  Баянхонгор аймаг, Багануур дүүрэг 66-80, Дархан-Уул аймаг, Орхон аймаг 81-53, Баянзүрх дүүрэг, Сүхбаатар дүүргийг 99-68-аар хожлоо.