Чөлөөт бөхийн дэлхийн аварга шалгаруулах тэмцээн Серби Улсын нийслэл Белград хотод явагдаж байна. Тэмцээн энэ сарын 18-ны өдөр хүртэл үргэлжлэх юм. Өнөөдөр 10:30-15:30 цагийн хооронд эмэгтэйчүүдийн 57, 59, 68, 72 кг-ын жингийн урьдчилсан барилдаан, эмэгтэйчүүдийн 50, 53, 65, 76 кг-ын жингийн  дагах барилдаан барилдаан, 19:00-22:00 цагт финалын шигшээ барилдаан, эмэгтэйчүүдийн 50, 53, 65, 76 кг жингийн шагнал гардуулах ёслол болно.

   Энэ өдөр эмэгтэйчүүдийн 57 кг-ын жинд Эрхэмбаярын Даваачимэг (Хилчин) наймны нэг финалд Өмнөд Солонгосын Hyungjoo KIM-тэй таарсан. Түүнийг ялахад Мексик, Узбекистаны бөхчүүдийн ялсантай барилдана. Хагас шигшээд олимпын алт, хүрэл медальт, дэлхийн гурван удаагийн аварга Хелен Марулистай таарч барилдах магадлал өндөр байгаа. Харин 59 кг-д 14 бөх барилдана. Бат-Эрдэнийн Эрдэнэсувд (Женко) эхлээд Казахстаны Диана Каюмоватай таарсан. Түүнийг ялбал, АНУ-ын Abigail Nette, Норвегийн Grace Jacob BULLEN нарын ялсантай барилдах юм.

  Эмэгтэйчүүдийн 68 кг-д Энхсайханы Дэлгэрмаа (Хүч) эхлээд Туркийн Несрин Бастай барилдана. Түүнийг хожих юм бол Токио 2020 олимпын мөнгөн медальт, Африкийн 11 удаагийн аварга Блессинг Оборудуду түүнийг хүлээж байна. Харин 72 кг-ын жинд Энх-Амарын Даваанасан (Алдар) Канадын Shauna Ailein KUEBECK-тэй барилдана. Тэрбээр Казахстаны Жамила Бакбергеновагийн хэсэгт оржээ.