Монголын бүх ард түмний спортын XV наадмын шатрын шигшээ тэмцээн Тусгаар тогтнолын ордонд энэ сарын 10-14-нд болж байна. Тэмцээнд 21 аймаг, есөн дүүргийн эрэгтэй 30, эмэгтэй 30 тамирчин өрсөлдөж буй бөгөөд эрэгтэйчүүдийн ангилалд Их мастер Д.Батсүрэн, Ц.Батчулуун, Г.Мөнхгал, ОУМ С.Ган-Эрдэнэ, эмэгтэйчүүдэд Их мастер Б.Мөнгөнтуул, Т.Мөнхзул, А.Энхтуул, Ү.Үүрийнтуяа нарын шилдгүүд бүртгүүлж, Швейцарь системээр есөн өрөг өрсөлдөх юм.

    Үүнээс гадна тус тэмцээнд их мастер гурав, олон улсын мастер гурав, эмэгтэй их мастер дөрөв, эмэгтэй олон улсын мастер дөрөв, дэлхийн шатрын холбооны мастер найм, дэлхийн шатрын холбооны дэд мастер хоёр, дотоодын цолтой 18 шатарчид өрсөлдөж байна. Нийт оролцож байгаа 60 шатарчны 42 нь буюу 70 хувь нь олон улсын болон дотоодын цолтой шатарчид өрсөлдөж байгаа нь энэхүү тэмцээний чанар чансаа, цар хүрээг илтгэсэн үзүүлэлт болж байгаа юм.