Баянхонгор аймгийн ИТХ-ын тогтоолоор тус аймгийн Баянлиг сумын ЕБС-ийг Монгол Улсын гавьяат тамирчин, нэрт бөх Ц.Нацагдоржийн нэрэмжит болгосон байна. Сургуулийг нэрэмжит болгосныг саяхан олон нийтэд зарлан сонордуулах үеэр Ц.Нацагдорж гавьяатын “Алдрын танхим”-ыг төрөлх сургуульд нь нээж, мөн хүчит бөхийн барилдаан, хурдан дааганы уралдаан, сурын харваа зохион байгуулжээ.

    “Минск-1975”  дэлхийн аварга шалгаруулах тэмцээний мөнгө, “Стамбул-1974” ДАШТ-ий хүрэл медальт, ахмадын дэлхийн хошой аварга, Монгол Улсын гавьяат тамирчин Ц.Нацагдорж нь Баянхонгор аймгийн Баянлиг сумын уугуул бөгөөд Баянлигийн сургуульд суралцан төгсөж, ажил амьдралын гараагаа эхэлсэн билээ.