Биеийн тамир, спортын улсын хорооны дарга Д.Жаргалсайхан МУИС-ийн удирдлагуудыг хүлээн авч уулзлаа. Уулзалтад МУИС-ийн захирал Б.Очирхуяг, Санхүү эрхэлсэн дэд захирал Ц.Болормаа, Хангамж үйлчилгээний газрын дарга В.Алтансүх, Биеийн тамирын тэнхимын эрхлэгч Л.Эрдэнэпүрэв нар оролцов.

   Уулзалтаар МУИС-ийн Эдийн засгийн сургуулийн ард баригдаж буй 1000 хүний суудалтай спорт цогцолборын барилгын ажлын явц болон цаашид хийж хэрэгжүүлэх асуудлаар санал солилцсон юм. Анх 2011 онд барилгын ажил эхэлсэн ч газрын маргааны улмаас барилгын ажил зогсжээ.

   Энэ цогцолбор нь 25 метрийн таван зам бүхий усан бассейн, бэлтгэлийн болон стандарт заалны хэсгүүдтэй. Хэрэв энэ барилга байгууламж МУИС-ийн мэдэлд очвол тус сургуулийн оюутан залуус биеийн тамир, спортоор хичээллэх, эрүүл чийрэг бие бялдартай болоход нь түлхэц болно гэж сургуулийн удирдлагууд үзэж байна.