Тэр бол Монголд анх удаа харайлтын төрлөөр медаль хүртсэн нэгэн. Арав гаруйхан насандаа олимпын тавцанд авьяас билэг, уян налархай байдлаа гайхуулж, монголчуудын спортын түүхэн дэх амжилтыг нэгээр нэмсэн билээ. Цагираг, харайлт зэрэг гимнастикийн олон төрөлд хүч чансаагаа сорьж, харайлтын төрөлд онцгойрсон түүхэн өдөр өнөөдөр тохиож байна. Монголын спортын гимнастикийн төрөлд бол гэгээ татсан өдөр. Тодорхой өгүүлбэл, “Сингапур-2010” Залуучуудын анхдугаар олимпоос гимнастикийн төрлөөр анх удаа алтан медаль хүртсэн нь энэ. Тэр бол Монголын спортын гимнастикийн тамирчин, Олон Улсын хэмжээний мастер Г.Эрдэнэболд.

   Тэрбээр тухайн үед олимпод оролцохдоо Туркийн Ф.Арикан , Испанийн Н.Абад нартай шагналын тавцанд хөл тавьсан бөгөөд Бразил ,Тайланд, Орос , Мексик , Украины гимнастикчид IV - VIII шигшээ байрт шалгарсан байдаг. Одоогоос 12 жилийн өмнө спортын түүхэнд мөнхүү анхны гэсэн замыг татсан түүний гавьяаг мартахын аргагүй. Тэрбээр тус олимпын олон төрөлд 37-р бичигдэж, харайлт, цагиргийн төрөлд шигшээ тоглолтод шалгаран, улмаар харайлтын төрөлд нь аваргалсан байдаг. Тэрбээр энэ тухай "Медаль хүрэх итгэлтэй байсан. Харин алт авна гэж бодоогүй. Сүүлийн дасгалын гүйцэтгэлээ хийж мөнгө юм уу хүрэл медальд ойртсон байх гэж бодсон" гэж ярьсан байдаг. Түүний нэг давуу тал, онцлог нь хүүхэд мөртлөө тухайн үед амжилт гаргаад төдийлөн хөөрч, баярлаагүй байсан. Мэдээж медаль хүртэж байгаад баярлаж байгаа ч сэтгэл хөдлөлөө их сайн дарсан тухайгаа ярьсан байдаг. Энэ нь спортоор хичээллэдэгтэй нь холбоотой байх.

Хөлбөмбөгийн мастер ааваас улбаатайгаар спортод дурлаж, хичээллэсээр тийн амжилт гаргаж, түүхэнд бичигдсэн.

  Тэрбээр анх “Афин-2004” олимпийг үзээд, гимнастикаар хичээллэхээр эргэлт буцалтгүй шийджээ. Гимнастикчин ээж нь ч дэмжиж, тэр үеэс л хичээллэж эхэлсэн тухайгаа ярьдаг. Чөлөөт хөдөлгөөн, модон морь, харайлтын төрөлд хачин их дуртай гэнэ. Харин цагирагийн төрөл хэцүү байдаг аж. Гимнастик манай улсын спортын хамгийн ууган төрөл мөртлөө төдийлөн амжилтын буухиа тааруу. Тэгвэл энэ төрөлд амжилт байгаа шүү гэдгийг харуулсан нь Г.Эрдэнэболд юм. Нэг зорьсон зүйлийнхээ төлөө тууштай зүтгэдэг, алив тэмцээний ард нь гарч байж салдаг түүний шаргуу, хөдөлмөрч, тууштай зан чанар түүнийг Монголын анхны гимнастикийн түүхэн дэх медалийн эзэн болгосон болов уу. 17 настай түүхэн амжилтыг гаргасан тэр өдгөө харин мэр, сэр тэмцээнд оролцоод, мөн хажуугаар нь сурч байгаа сурагтай.

 Хамгийн сүүлд гэхэд, ОХУ-ын Ленинс Кузнец хотноо болсон гимнастикийн  “Сибирийн нээлттэй цом”-ын аварга шалгаруулах тэмцээнээс мөнгө медаль хүртсэн амжилттай байгаа билээ. Бага залуудаа түүхэн амжилт гаргаж, Монголынхоо нэрийг мандуулсан түүний түүхэн гавьяат энэ өдрийг Монголчууд хэзээ ч мартахгүй. Түүнд халуун баяр хүргэж, спортын амжилт дүүрэн байхыг хүсье.