Манай улс 2023 онд гимнастикийн найм дахь удаагийн Ази тивийн аварга шалгаруулах тэмцээнийг, 2024 онд зургаа дахь удаагийн Азийн “Гимнастрада” их наадмыг Улаанбаатар хотноо зохион байгуулах эрхийг Азийн гимнастикийн холбооноос авсан билээ.  Тус хоёр тэмцээнийг зохион байгуулах спортын ордон, барилга байгууламж, тамирчдын байрлах зочид буудал зэргийг үзэж, шалгах ажлаар Олон улсын гимнастикийн холбооны Нийтийн гимнастикийн техникийн хорооны дэд ерөнхийлөгч, Япон Улсын иргэн Араки Тацуо манай оронд хүрэлцэн ирээд байна.

   Олон улсын олимпын хорооны гишүүн, МҮОХ-ны ерөнхийлөгч Б.Баттүшиг Араки Тацуог олимпик хауст хүлээн авч уулзан, ажил хэргийн яриа өрнүүллээ. Араки Тацуо уулзалтын үеэр “Гимнастрада” наадмын талаар танилцуулж, Олон улсын гимнастикийн холбооны зүгээс бэлтгэл ажилд анхаарлаа хандуулж байгааг онцлов.

   Монголын үндэсний олимпын хорооны ерөнхийлөгч Б.Баттүшиг өндөр зэрэглэлийн хоёр арга хэмжээ зохион байгуулахаар болсон Монголын гимнастикийн холбоонд баяр хүргэж, наадмын зохион байгуулалтад хамтран ажиллахад бэлэн байгаагаа илэрхийллээ. Зургаа дахь удаагийн Азийн “Гимнастрада” наадамд 16 орны 1500 гаруй оролцогч хамрагдах юм байна.