Олон улсын цэргийн наадмын хүрээнд “Аравт” морин цэргийн уралдаан Монгол Улсад ирэх сарын 13-18-ны өдрүүдэд зохион байгуулагдах гэж байна. Уралдааны өмнөх бэлтгэл ажлыг оролцогч орны дайчид өдөр бүр хангасаар байгаа аж. Монгол Улс, ОХУ, Узбекистан Улсын баг тамирчид морь сэлгэх, морин эргүүл хийх, буудлагын дасгал боловсруулах, алсын зайн цэгүүдэд дадлага хийх сургалтуудыг энэ сарын 8-ны өдөр гүйцэтгэжээ.

   Харин Монгол Улсад өнөөдөр хүрэлцэн ирсэн Бүгд Найрамдах Зимбабве Улсын баг тамирчид хүн нэг бүрийн зэвсэг, дуулга, хантаазаа гардан авч, бэлтгэлдээ шамдан орлоо. Энэхүү уралдаан нь бэлтгэлийн, алсын зайны морин маршийн, богино зайны холимог буухиа, төгсгөлийн буюу тэмцээнийг дүгнэх гэсэн дөрвөн үе шаттай явагдана. Нэгдүгээр шат нь тэмцээндээ бэлтгэх үе шат бөгөөд оролцогч орны баг тамирчдыг хүлээн авч байрлуулах, аюулгүй ажиллагааны заавар танилцуулах, энэ чиглэлийн сургалтууд явуулах, уралдааны бэлтгэлийг хангуулах, морьтой дадлага сургалт хийх, уралдааны маршрутыг баг тамирчдад танилцуулах юм.

   Хоёрдугаар шатанд алсын зайны морин марш зохион байгуулагдана. Энэ шатанд уралдаанд оролцогч орны цэргийн алба хаагчид уул, ой мод, гол ус, элс, бартаа саад бүхий 130 км замыг хоёр өдөр, нэг шөнийн дотор маршрутын дагуу туулна. Гэхдээ зүгээр туулаад өнгөрөхгүй, замдаа цэрэг хүний гүйцэтгэх ёстой дөрвөн даалгаварыг гүйцэтгэнэ. Үүнд усан болон минэжүүлсэн талбайг туулах, морь бугуйлдах, уналгад бэлтгэх, морин эргүүлээр бай олох, бартаа саад бүхий газарт хоноглож, эцэст нь шархтанд эмнэлгийн анхан шатны тусламж үзүүлэх, шархтан, сум галт хэрэглэлийг хөнөөлийн голомтоос татан гаргах, морьдоо богино хугацаанд услах дасгалуудыг гүйцэтгэнэ.

   Харин гуравдугаар шатанд ойрын зайны холимог буухиагаар, явганаар болон морьтойгоор маршрутын дагуу байрлах, цэгүүдэд өгөгдсөн гранат шидэх, саадын зурвас туулах, буудлагын дасгал гүйцэтгэх, тактикийн ажиллагаа, морины давхилт дунд гранат шидэх зэрэг даалгавруудыг гүйцэтгэн барианд орно. Төгсгөлд нь тэмцээний дүнг нэгтгэж, уралдаанд амжилт үзүүлсэн баг тамирчдад шагнал гардуулах ёслол болох аж.

  Тус морин, уралдааны бэлтгэлийн явцад Монгол Улсын зан заншил, түүх, соёл уламжлалыг сурталчлах, цэргийн алба хаагчдын нөхөрлөлийг бататгах хүрээнд бэсрэг наадам, соёл урлаг болон спортын өдөрлөгүүд, “Адуучин” тэмцээн зэрэг олон арга хэмжээ шат дараатай зохион байгуулагдах юм байна.