Монгол Улсын баруун хязгаараас зүүн хил хүртэл 2400 км замыг уулын дугуйгаар хамгийн богино хугацаанд буюу долоо хоногт аялж гиннесийн дээд амжилтыг шинээр тогтоох гэж байгаа ХБНГУ-ын экстрем спортын тамирчин Гийдо Кунзе нийслэлд иржээ.

Тэрбээо Увс, Архангай аймгийн нутгаар 1487 км аялаад Улаанбаатар хотноо өглөө 08.00 цагт орж ирэхэд Монголын Дугуйн холбооны ерөнхийлөгч, дэд ерөнхийлөгч, клубүүдын төлөөллүүдийн хамт 22-ын товчоон дээр тосч аван Сүхбаатар аймаг руу үдэн гаргаж өгчээ.

Энэхүү аяллыг Монголын дугуйн холбоо, Байгаль орчин аялал жуулчлалын яам, Нийслэлийн ЗДТГ, УИХ-ын гишүүн асан Д.Тэрбишдагва, “Tsolmon travel”, ХБНГУ дахь соёлын элч О.Оюунтуяа болон олон байгууллага, төр нийгмийн зүтгэлтнүүд хамтран зохион байгуулж байгаа аж.

Тус аялал нь Монгол Улс төдийгүй Монголын дугуйн спорт, аяллыг дэлхийд сурталчлах үнэ цэнтэй үйлс болох юм. Гийдо Кунзегийн Увсаас Улаанбаатар хүрэх замд Солонготын даваа, Цагаан даваа гэсэн хоёр том даваа таарсны зэрэгцээ шөнө дугуйгаар явахад баруун аймгууд их хүйтэн байжээ. Хэдий тийм боловч өдөрт ердөө 2-3 цаг унтаж хоногийн 24 цагийн 21-22 цагт нь тасралтгүй дугуй жийж байгаа гэнэ.

Гийдо Кунзегийн аяллын арын албанд түүний эхнэр Габи болон хоёр хүү нь зүтгэж аяллын хүнд хүчрийг хуваалцаж байгаа аж. Тэд Монгол орон, монголчуудын талаар маш сайхан сэтгэгдэлтэй байгаагаа хуваалцсан байна.