Энэтхэг Улсын  Ченнай хотод болж буй шатрын олимпиадад Монгол Улсаа төлөөлөн оролцож буй Үндэсний шигшээ багийн тамирчидтай 10 дугаар өргийн тоглолт эхлэхээс өмнө УИХ-ын дарга Г.Занданшатар онлайнаар холбогдон, баяр хүргэж, амжилт хүслээ.  Манай шатарчид 12 өрөг тоглох тэмцээний есөн өргийн дараах байдлаар эмэгтэй баг зургаа хожиж, нэг тэнцэж,  хоёр хожигдолтойгоор 13 оноотой 162 багаас 11 дүгээрт бичигдэж байна.

    Хувийн болон ширээний амжилтаар “Топ-20”-д манай гурван эмэгтэй шатарчин явна. Нэгдүгээр ширээнд эмэгтэйчүүдийн их мастер А.Энхтуул долоон өрөг тоглосноос  дөрвөн тэнцээ, нэг хожигдолтой, дөрвөн оноотой 14 дүгээрт жагсаж байгаа. Харин гуравдугаар ширээнд эмэгтэй олон улсын мастер Т.Мөнхзул есөн өрөг тоглож, таван хожил, дөрвөн тэнцээтэйгээр долоон оноотой "айргийн тавд" явна.

Тэгвэл дөрөвдүгээр ширээнд дэд мастер Б.Мөнгөнзул найман өрөг нүүснээс долоо хожиж, нэг хожигдон долоон оноотой IV ширээндээ хоёрдугаарт явж байна. Б.Мөнгөнзул үлдсэн хоёр өрөгтөө сайн тогловол ширээндээ медальт байрт шалгарах бүрэн боломжтой байгаа. Эмэгтэй баг маань сүүлийн хоёр өргөө амжилттай тогловол эхний аравдугаар байрт орж, түүхэн амжилтын эзэн болно.

   Манай эрэгтэй баг есөн өргийн дараа дөрвөн хожил, хоёр тэнцээ, гурван хожигдолтой, 10 оноотойгоор 188 багаас 62 дугаарт жагсаж байна. Г.Занданшатар дарга тамирчдаа дасгалжуулж байгаа эмэгтэй шигшээ багийн дасгалжуулагч Ц.Батсайхан, эрэгтэй шигшээ багийн дасгалжуулагч С.Ган-Од болон баг тамирчдаа ахалж яваа Монголын шатрын холбооны ерөнхийлөгч Э.Гурванбаатар, Үндэсний шигшээ багийн тамирчиддаа оюуны спортоор Монголынхоо нэрийг дэлхийд цуурайтуулж буйд дахин дахин баяр хүргэж, амжилт, ялалтыг хүсэн ерөөлөө.