Дархан-Уул аймгийн Жүдо бөхийн холбоо, Өмнөд Солонгосын Тэжонь хотын Жүдо бөхийн холбоотой хамтран ажиллах санамж бичигт өнөөдөр гарын үсэг зуржээ. Санамж бичигт гарын үсэг зурах ажиллагааны дараагаар Дархан-Уул аймгийн Засаг даргын орлогч Б.Жавхлан, Монгол Улсын гавьяат дасгалжуулагч Н.Батлав, аймгийн БТСГ-ын дарга А.Амраа, Дархан-Уул аймгийн Жүдо бөхийн холбооны тэргүүн М.Төмөртогоо, тус аймгийн Жүдо бөхийн холбооны нарийн бичгийн дарга Г.Батбилэг болон бусад албаны төлөөлөл Солонгос Улсын Тэжонь хотын Жүдо бөхийн холбооны ерөнхийлөгчтэй уулзалт хийн харилцан санал солилцсон байна.

   Жүдо бөхийн спортыг хөгжүүлэхэд аймаг орон нутгийн зүгээс бүх тал дээр дэмжин ажиллах болно гэдгээ аймгийн Засаг даргын орлогч Б.Жавхлан уулзалтын үеэр онцолж байлаа. Дархан-Уул аймагт жүдо бөхийн спортыг хөгжүүлэх, өсвөр үеийн тамирчдын техник, ур чадварыг дээшлүүлэх, хүүхэд залуучуудад бие бялдрын болон оюун санааны хүмүүжил олгоход энэхүү хамтын ажиллагааны санамж бичгийн гол зорилго оршиж байгаа аж.