Тулгар төрийн 2230, 2231, Их Монгол Улсын 815, 816, Үндэсний эрх чөлөө, тусгаар тогтнолоо сэргээн мандуулсны 110, 111, Ардын хувьсгалын 100, 101 жилийн түүхэн ойн наадамд Ховд аймгийн Буянт сумын харьяат бөх, улсын харцага О.Хангай түрүүлж, улсын аварга цол хүртсэн. Олон жил түрүү бөхийн таамагт нэрлэгдсэн тэрбээр 32 насандаа Монгол Улсын отгон аварга болж, наадамчин олныг баярлуулсан билээ. Ингээд түүнтэй холбоотой зарим баримтыг хүргэе.

1. Оргихын Хангай (1990 онд төрсөн) нь Ховд аймгийн Буянт сумын харьяат бөх юм.

2. Түүний аав Оргих нь Говь-Алтай аймгийн Жаргалан сумын харьяат, улсын тэргүүний тариаланч гэдэг. Гэхдээ О.Хангай нь Ховд аймгаар харьяалагддаг. Тэрбээр энэ тухайгаа “Би Ховд аймагт төрж өссөн. Манай багш Ховд аймгийнх, би өөрөө Ховд дэвжээндээ бэлтгэл хийдэг болохоороо Ховд аймгаар харьяалагдаж барилддаг” гэсэн байдаг.

3. Тэрбээр ерөнхий боловсролын сургуульд байхдаа волейболын спортоор хичээллэдэг, чамгүй амжилттай тамирчин байжээ. Харин бөхийн спортоор их сургуулийнхаа төгсөх курсээс эхлэн хичээллэсэн байдаг.

4. Түүний гэргийг Н.Дэлгэртуяа гэдэг. Ховд аймгийн Манхан сумын харьяат. Тэд арван жилдээ танилцсан гэдэг.

5. О.Хангай нь сэргээш хэрэглэсэн нь тогтоогдсон бөхчүүдийг дахин барилдахыг эсэргүүцэгчдийн нэг юм. Тэрбээр оны эхээр болсон “Жем интернэшнл” группийн нэрэмжит, “Улсын харцага цолд хүндэтгэл үзүүлэх” Улс, аймгийн алдар цолтой 256 бөхийн барилдааныг орхин гарсан бөгөөд цахим хуудастаа “Допингийн шинжилгээнд бүдэрч, баяр наадмын комиссоос 11 сараар эрхээ хасуулсан аварга, арслан хоёрыг Монголын Үндэсний Бөхийн Холбоо барилдахыг зөвшөөрч бүртгэжээ. Баяр наадмын комиссоос ямар үндэслэлээр ийм шийдвэр гаргасан юм, бүү мэд. Өмнө нь шинжилгээнд бүдэрсэн бөхчүүд хоёр жилээр эрхээ хасуулж байсан. Одоо зарим нь 4-8 жилээр эрхээ хасуулж байхад харилцан адилгүй шийдвэр гаргасан нь харамсалтай. Үүнийг ард түмэн, бөх сонирхогчид, шударгаар хөдөлмөрлөж байгаа бөхчүүд хүлээн зөвшөөрч байна уу. Би бол хүлээн зөвшөөрөхгүй байна” хэмээн бичиж байлаа.

Тэрбээр улсын наадмын дэвжээнд

            (2017 Он) АХ-ын 96 жилийн ойн баяр наадамд улсын заан Б.Пүрэвсайханаар дөрөв, улсын арслан Э.Оюунболдоор тав, аймгийн арслан Б.Сериктай тунан барилдаж, зургаа даван шөвгөрч "Улсын харцага" цолыг хүртсэн. (512 бөх зодоглосон.)

Аймгийн наадмын дэвжээнд

           (2012 он) Ховд аймгийн баяр наадамд аймгийн харцага Н.Батсайханд өвдөг шороодон үзүүрлэж "Аймгийн заан" цол хүртсэн.

(256 бөх зодоглосон.)

          (2013 он) Бүх цэргийн баяр наадамд тав давж шөвгөрөн "Нэмэх" чимэг хүртсэн. (256 бөх зодоглосон.)

          (2013 он) Ховд аймгийн баяр наадамд аймгийн начин Д.Бадамгараваар найм даван түрүүлж "Аймгийн арслан" цол хүртсэн.

(256 бөх зодоглосон.)

           (2017 он) Бүх цэргийн баяр наадамд тав давж шөвгөрөн "Өсөх" чимэг хүртсэн. (256 бөх зодоглосон.)