Ардын хувьсгалын 100, 101 жилийн ойн баяр наадамд Увс аймгийн Хяргас сумын харъяат, Монгол Улсын Хөдөлмөрийн баатар, Монгол, ОХУ-ын Гавьяат тамирчин, олимпын мөнгөн медальт, чөлөөт бөхийн дэлхийн аварга, XX зууны манлай бөх, даяар дуурсагдах далай, даян, дархан аварга Х.Баянмөнх цолоо дуудуулан албан ёсоор зодог тайлав.

   Тэрбээр цолоо дуудуулан зодог тайлсныхаа дараагаар “Их аз хийморьтой үйл явдал тохиож байна. Би өнөөдөр 80 хүрч, төр, ард түмний их баяр наадам 100 наслалаа. Энэ тохиолдол бол засаг төрөөс зодгоо тайлах эрхийг надад өгч, сайхан ёслон тэмдэглэж байгаад их баяртай байна.

   Мөн өнөөдөр надад “Дахин ногоон зүлэг талбай дээрээ зодог шуудагтайгаа хүчээ үзэж чадахгүй боллоо” гэсэн хөнгөн мэдрэмж төрж байна. Гэхдээ би өөрөө өөртөө хатуу санамж үг хэлж байна. “Чи 13 настай бөхийн аманд гарч байсан. Одоо 80 настай, энэ ногоон зүлгэн дээр 68 жил чи хүчээ үзлээ. Ханатлаа барилдлаа. Дэлхийд монгол бөхийнхөө нэрийг ханатал нь мандууллаа. Шинжлэх ухаан, шавь нар бэлтгэх ажлаа гүйцэтгэлээ. Болоо юм биш үү чи” гэж өөртөө хэлээд, зодог тайлахаа хүлээн зөвшөөрч байна.

         Цаашид миний Монголын ард түмэн өвөг дээдсийнхээ үлдээсэн өв уламжлал, дэлгэр дүүрэн гурван зүйлийн наадмыг чанартай сайн хийж, цэвэр ариун ёс зүйтэй авч явж, Монголын өвөг дээдсийн үлдээсэн энэ их өв соёлыг чамбайхан, чансаатайхан авч явна гэж би найдаж байна. Олон түмэндээ эрүүл энх байгаарай, сэтгэл санаа сайхан байгаарай. Бусдын сайн сайхнаар баярлаж яваарай. Санааныхаа зоргоор амьдардаг хорвоо учраас сайхан санаатай яваарай гэж ерөөгөөд, ард түмэндээ үүрд мөнх та бүхэн жаргал цэнгэлтэй баярлаж яваарай гэж ерөөе” хэмээн  сэтгэгдлээ илэрхийлэв.