Үндэсний баяр наадмын хүчит бөхийн барилдааны дөрвийн даваа үргэлжилж байна. Бөх сонирхогч, наадамчин олон улсын харцага Ш.Мөнгөнбаатарыг өнөө жил өнгөтэй, сайхан барилдана хэмээн горилж байсан ч гэр бүлд нь хүнд уй гашуу тохиосон учир гурвын даваанд тахимаа өгсөн байна. Тодруулбал, Ш.Мөнгөнбаатар харцагын аав нь урд шөнө бурхан болжээ.

      Тэрбээр, гурвын даваанд аймгийн начин Т.Дэчинжүрмэдэд тахимаа өгснийхөө дараагаар өөрийн цахим хуудсандаа ийн нийтэлжээ.  

УЛСЫН ХАРЦАГА Ш.МӨНГӨНБААТАР: 

-Аав минь 2022.07.11-ний орой бурханы орондоо дэвшсэн мэдээг сая авлаа. Хүний хайр гэж агуу юм аа. Миний барилдааныг бодоод, сэтгэлийг минь тайван байлгах гэсэндээ надаас нуусан гэр бүл, ах дүү нартаа мэхийн ёслоё.
 

Түүхт ойгоороо сайхан залууд гурвын даваанд тахимаа өглөө. Шударга, сайхан наадсандаа сэтгэл тэнүүн байна аа. Аав минь ч бас тэнгэрээс хараад баяссан байхаа. Аав минь 100 жилийн ойгоо угтаад, 85 насандаа үр хүүхэд биднийгээ орхин, тэнгэрт дэвшлээ. Уулзаж чадаагүй ч дэндүү их ухааны тань үргэлжлэл байхийг хичээнэ ээ. Өдий хүртэл тантайгаа хамт байсандаа эрх танхил, отгон хүү нь сэтгэл дүүрэн байна аа.

Тэнгэрт хүрэх зам нь гэрэлтэй байг. Хайрт аавдаа мэхийн ёслоё!   Ум сайн амгалан болтугай