Тулгар төрийн 2230, 2231, Их Монгол Улс байгуулагдсаны 815, 816, Үндэсний эрх чөлөө, тусгаар тогтнолоо сэргээн мандуулсны 110, 111, Ардын хувьсгалын 100, 101 жилийн ойн баяр наадамд зориулсан улс, аймгийн цолтой хүчит 1024 бөхийн барилдаанд улсын арслан Э.Оюунболд зодоглож, гурвын даваанд өвдөг шороодсон. Харин барилдаан дууссаны дараа Э.Оюунболд унасан бөхөө зодох гэж дайрсан гэх дүрс бичлэг цахим сүлжээнд түгсэн.

Энэ талаар улсын арслан Э.Оюунболд мэдээлэл өглөө. Тэрбээр “Бид хоёр эхэлж барилдаад би давсан. Гэтэл Хөлийн цэцээс бид хоёрыг “Дахиж барилд” гэсэн. Харин би нэг их зүйл ярилгүй дахиад л барилдсан юм.

Олон нийтийн нүдэн дээр муухай аашилсандаа уучлалт гуйж байна. Надад уур, бухимдал их бий. Би дөнгөж өчигдөр аавынхаа 49 хоногийг хураагаад өнөөдөр барилдаж байна. Монголчууд над руу маш их дайрч байна. Бүгд болж өнгөрсөн. Би бүх өр, төлөөсөө өгсөн. Хийгээгүй хэргийнхээ төлөө цолоо хүртэл өгсөн. МҮБХ гэж зөвхөн миний эсрэг зогссон холбоо боллоо.

                              Хүнд элэг бүтэн байхаас илүү сайхан зүйл гэж юу байх вэ. Би 2014 оноос хойш аавтайгаа хамт наадсан. Харин одоо олны хэл амыг үнэхээр дийлэхгүй юм байна” гэв.