Үндэсний их баяр наадмын хурдан морины соёолон насны уралдаанд Архангай аймгийн Хотонт сумын уугуул Манлай уяач Дуламсүрэнгийн Лхагвасүрэнгийн хул үрээ айргийн тавд хурдаллаа.

               Хурдан соёолонгоо айрагдуулсан манлай уяач Д.Лхагвасүрэн  “Ах нь 41 дэх жилдээ төрийн наадамд морь мордуулж байгаа хүн. Миний төрсөн ах Дуламсүрэнгийн Пүрэвсүрэн Улсын баяр наадамд бор шүдлэнгээ түрүүлгэсэн. Энэ хул халзан үрээ маань Тод манлай уяач Төмөрбаатарын Галбадрахын унаган адуу. Өнгөрсөн жил баруун бүсэд аман хүзүүдэж байсан юм. Жаахан гараа алдчихав уу даа гэж л бодож байна. Төрийнхөө тэгш ойн баяр наадамд анх удаа соёолон айрагдуулж үзлээ. Сэтгэгдэл сайхан байна. Одоо даага уралдуулах гээд байж байна. Нийт Архангайчууддаа тэр дундаа Хотонт сумын ард иргэддээ баяр наадмын мэнд хүргэе” хэмээн баярын сэтгэгдлээ хуваалцлаа.