Тулгар төрийн 2230, 2231, Их Монгол Улс байгуулагдсаны 815, 816, Үндэсний эрх чөлөө, тусгаар тогтнолоо сэргээн мандуулсны 110, 111, Ардын хувьсгалын 100, 101 жилийн ойн баяр наадамд зориулсан улс, аймгийн цолтой хүчит 1024 бөхийн барилдааны нэгийн даваанд улсын заан Д.Бумбаяр залуу бөх Ө.Өсөхбаяртай учраа таарсан. Улмаар хоёр бөх зэрэг унахад засуулууд улсын заан Д.Бумбаярыг давсан гээд туг тойруулсан юм.

Тэгвэл Хөлийн цэцээс улсын заан Д.Бумбаяр, залуу бөх Ө.Өсөхбаяр хоёрын барилдааны бичлэгийг ухрааж, удаашруулан үзсэнээр ялалтыг залуу бөх Ө.Өсөхбаярт шилжүүлжээ. Харин эргэлзээтэй шүүлтийг улсын заан Д.Бумбаярыг давсан болгож, туг тойруулсан хоёр засуулд хариуцлага тооцож, ажиллах эрхийг нь хассан байна.