Жүжигчин Ц.Энхтулгын төрсөн өдөр өнөөдөр тохиож байна. Түүнийг бид “Эмэгтэйчүүдээ хайрлая”, “Төмс найз”, “Ганстерууд”, “Дүрмээ л дагана шүү” зэрэг хөгжилтэй богино хэмжээний бичлэг болон “Мах уу, шөл үү” контентоороо хэдийнэ олны танил болсон.

       Тэрбээр 2009 онд Зохиомж дээд сургуулийг жүжигчин мэргэжлээр төгссөнөөс хойш “ХТҮЦ” продакшнд ажиллаж байгаад, хувиараа продакшнтай болж, богино хэмжээний бичлэг хийдэг болсон байна. Тэрбээр “Бага байхаас жүжигчний мэргэжил надад гоё санагддаг байсан. Хүмүүст эерэг сайхан энерги өгч, инээд бэлэглэдэг. Тэгээд хэрэв би энэ мэргэжлийг сонгох юм бол үргэлж аз жаргалтай, бусдыг мөн аз жаргалтай байлгах юм байна гээд багаасаа дурласаар байгаад суралцаад, ажиллаж байгаадаа баяртай явдаг. Өдөр бүр л багынхаа мөрөөдлөөр амьдарч байгаадаа баярлаж, дуртай зүйлээ хийж байгаа учир аз жаргалтай байдаг” хэмээн ярьж байсан.

    Нэг тийм өнгө аястай, эмэгтэй хүний дүрд чамгүй сайн хувирдаг залуу жүжигчин бол тэр. Нийгэмд хөгжилтэй, эерэг энергэтэй олон уран бүтэлээр нөлөөлөл үзүүлж, сошиал үзэгчдийг байлдан дагуулж чадаж байгаа уран бүтээлч. Хүмүүс хаана ч Алгаа, Нямка хоёроо үзэх дуртай, өдгөө ч үзсээр байгаа.