• Өнөөдөр 2026-06-29

ТЭСРЭЛТ ХИЙГЭЭГҮЙ Ч ХҮЛЭЭЛТ ДҮҮРЭН “НОЁН ЭМЭГТЭЙ”

2022-09-13,   1298

      “Хувьсал” продакшны долоо дахь уран бүтээл  “Ноён эмэгтэй” киног үзлээ. Хугацааны хувьд ч тэр өмнөх уран бүтээлүүдээс нь хамгийн их “нухаж” хийсэн бүтээл гэж харж, хүлээж үзсэн.
 
     Гэхдээ хүлээснийхээ хэрээр ханатал мэдрэмж аваагүй ч “Хувьсал” продакшны өөрийн өнгө төрх эрхгүй цухалзаж байна лээ. Өөрөөр хэлбэл, урлагт тэдний гэсэн өнгө аяс, хэв маяг хэдийн тогтсон. МУГЖ У.Уранчимэгийн хөтөлж яваа “Хувьсал” продакшн хэзээний л үзэгчдийн хүлээлтэд байж, чамбай уран бүтээлүүдийг хүргэсээр ирсэн. Энэ удаад ч мөн тэдний хичээл зүтгэл, өмнөх бүтээлүүдээсээ илүү, давсан зүйл хийе гэсэн эрмэлзлэл нь “Ноён эмэгтэй” киноноос илт мэдрэгдэж байна. Гэхдээ яг давж, тасраагүйг мөн онцлон өгүүлмээр байна. Шорон бол аль ч кинон хүнд орчин ахуй. Энэ ч утгаар эл киноны ихэнх үйл явдал шоронгийн орчинд өрнөж байгаа нь киноны нэг өнгө байв. Үйл явдлыг алгасаад дүрүүд рүү орье.
 
     “Ноён эмэгтэй” киноны гол дүр болох МУГЖ У.Уранчимэг буюу Нараагийн дүр тус кинонд “ноёлж” байв. Урнаагийн дүрүүдийг үзэгчид андахгүй байх. Эрч хүч, ихэмсэг байдал, хамаг бүхнээ шавхаж, “асгаж” тоглодгийг ч мэднэ. Урнаа бол уран бүтээлчийн хувьд ус, гал шиг жүжигчин.
 
Өөрөөр хэлбэл, "Зэрлэг цэцэгсийн хүлэмж", "Зүрхээр наадагч",  "Миний нууц" кинонд тэр галзуу, цоглог, өөртөө итгэлтэй эмэгтэйн дүрийг чадварлаг гаргасан бол "Тэнгэрээс буусан од" кинонд Янжинлхам гэх намдуухан багшийн дүрийг илүү ч үгүй, дутуу ч үгүй их сайхан гаргасан.
 
    Үүнээс харахад тэр ямар ч дүрд хувирч, өөрчлөгдөж чаддаг чадварлаг уран бүтээлч. Нөгөө талаар Урнаа бол маш сайн удирдагч. Киноныхоо ерөнхий найруулагчаар ажиллахын зэрэгцээ гол дүрд нь тоглоно гэдэг тухайн уран бүтээлчээс асар их нөөц чадвар, хувийн зохион байгуулалт шаардана. Тэр энэ бүгдийг гарамгай гаргаж, том багийг удирдаж яваа сайн удирдагч. Ийм ч учраас "Хувьсал" продакшны уран бүтээлүүд өөрийн гэсэн өнгө төрх, хэлэх санаатай байдаг болов уу.
 
 
     Энэ удаад ч мөн Нараа хэмээх дотоот сэтгэлдээ мөн чанараа алдаагүй ч гаднаа хатуу ширүүн, шоронгийн “босс” эмэгтэйн дүрийг чадварлаг бүтээжээ. Гэхдээ Урнаагийн тоглосон бусад дүрээс тэс өөр байгаагүй. Ерөнхий характер, өнгө байдал “Зэрлэг цэцэгсийн хүлэмж” киноны Цооёогийн дүрийг санагдуулж байсан. Үндсэндээ Урнаа айхтар хувирч, тэсэрч, өөр байгаагүй. Дараагийн гол дүр бол залуу жүжигчин О.Дөлгөөн. Тэр ч мөн энэ кинонд өөрчлөгдсөнгүй. Эхнээсээ дуустал зөөлөн байсаар зөөлөн дууссан. Удаан уран бүтээлд ороогүй жүжигчин Б.Баярмаагийн дүр ч сонин биш байсан. Сонин нь гэвэл удаан үзэгчидтэйгээ уулзаагүй нь л байв. Харин энэ дунд хамгийн хөөрхөн киноны шигтгээ болсон дүр бол жүжигчин О.Үржинхандын дүр байв.
 
Хүн хаана ч байж болно, гэхдээ хүн хүнээрээ, өссөн орчин ахуй, хүмүүжлээрээ байх ёстой гэдгийг тод томруун харуулж чадсан эерэг дүр байсан.
 
    Хүнд хэсгүүд олонтой болохоор ч тэр үү ихэнх дүр ямар нэгэн асуудалд орж, хэрүүл, зодоон хийж байсан бол О.Үржинхандын дүр гарангуут л нэг тийм тайвшрал өгч, үзэгчийн зүрх сэтгэл тэрхэн зууртаа амарч байсныг дурдах нь зүйтэй байх. Харин киноны хэсгийг амилуулж байсан дүр бол МУГЖ  Ж.Оюундарийн дүр. Харийн шоронгоос эх орныхоо шоронд ирээд баярлаж, эх орон, гэр бүлийн үнэ цэнийг мэдэрсэн түүний дүр эрхгүй л үзсэн үзэгчдэд ч тийм л мэдрэмжийг өгч байсан. Ийнхүү дүр болон уран бүтээлийн хувьд ч тэсрэлт багатай ч “Хувьсал”-ыг гэсэн үзэгчид хүлээлт дүүрэн үзсээр байна.

ТЭСРЭЛТ ХИЙГЭЭГҮЙ Ч ХҮЛЭЭЛТ ДҮҮРЭН “НОЁН ЭМЭГТЭЙ”
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2026 © Зохиогчийн эрх хуулиар хамгаалагдсан. Мэдээлэл хуулбарлах хориотой.