“Doctor” уран сайхны киноны гол дүрийн жүжигчин, СТА С.Төмөртулгатай ярилцлаа. Тэрбээр санаандгүй байдлаар “Морьтой ч болоосой” уран сайхны кинонд дуу оруулж, кино урлагт эргэлт буцалтгүй дурлаж байжээ. “360 градус” хошин мэдээллийн хөтөлбөрийн уран бүтээлч гэдгээр нь үзэгчид түүнийг эчнээ таньдаг билээ. 

-Сайн байна уу. Шинэхэн уран бүтээлээ өлгийдөн авсанд баяр хүргэе. Уншигчдад өөрийгөө танилцуулаач?

            -Намайг Сарантуяагийн Төмөртулга гэдэг. 2003 онд КУДС-ийг МУАЖ П.Цэрэндавга, МУГЖ Д.Мэндбаяр тэргүүтэй мундаг багш нарын удирдлага дор жүжигчин мэргэжлийг эзэмшиж, төгссөн.

-Шинэ уран бүтээлийнхээ тухай яриач?

            -“Dream entertainment” арван жилийнхээ ойд зориулан  “Doctor” УСК-г бүтээсэн. Анх кино зохиолоо хүлээж аваад уншихад надад маш их таалагдсан. Яагаад гэхээр яг л өнөөгийн нийгэмд өрнөж байгаа хууль бус ажиллагаа, хууль үйлчилдэггүй эрх мэдэлтнүүдийн дүр зургийг маш тод томруунаар харуулж чадсан байсан.  Кино зураг авалт 2021 онд өвөл, намрын улирлын дамнан хийгдэж, саяхан үзэгчдийн хүртээл болоод байна.

 -“Doctor” УСК-д ямар дүр бүтээсэн бэ?

            -Би Мөнхөө гэх залуугийн дүрийг бүтээсэн. С.Төмөртулга гэх хувь хүнээс маань тэс өөр хүн байсан. Миний дүрийн хувьд аймхай, хувиа хичээсэн зан чанартай. Эмнэлгийн жолооч байж байгаад томоохон асуудалтай орооцолдсоноор киноны үйл явдал эхэлдэг.

-Хүндрэлтэй зураг авалт байсан уу?

            -Өвлийн улиралд гадаа зураг авахад хүндрэлтэй байдаг. Ой дунд цагдаа нараас зугтааж, гүйж харайдаг үзэгдлүүд дээр халтирах, даарах үе байсан.

-Эсрэг дүр бүтээх ямар байсан бэ?

            -Энэ киноны хувд зогсолтгүй адал явдалтай, хурдтай үзэгдлүүд гардаг. Жүжигчдээс зугтаах, айх, хаширлах, баярлах зэрэг олон сэтгэл хөдлөлийг шаардсан. Өөрийгөө өөр өнцгөөс харж, шинээр нээсэн дээ.

-“Doctor” уран сайхны киног үзээд, үзэгчид юуг ойлгож авч театраас гарах бол?

            - "Мөнгө, алдар нэр, албан тушаалын араас хэт их хөөцөлдвөл эргээд маш их зовлонг өөртөө хурааж, уналтад ордог шүү, хүн чанараа битгий гээгээрэй" гэх утга санааг ерөнхийдөө харуулна. Мөн эмчийн мэргэжил, нөхөрлөлийн үнэ цэнийг ойлгож авна. Үзэгчдийг уйдаахгүй адал явдалт уран сайхны кино гэдгийг хэлмээр байна.

-Та яагаад жүжигчин мэргэжлийг сонгосон бэ?

            -Арван жилд байхдаа бусад жүжигчний адил урлагийн үзлэгт идэвхтэй оролцдог, хөдөлгөөнтэй хүүхэд байсан. Тэгээд санаандгүй байдлаар “Морьтой ч болоосой” кинонд дуу оруулж жүжигчин болох эхлэл тавигдсан. Том дэлгэц хараад дуу оруулахад мэдэрсэн мэдрэмжээрээ хөглөгдөж кино урлаг руу эргэлт буцалтгүй орсон доо. 

-Урлагийн хүн байх амаргүй шүү дээ. Гэр бүл тань хэр ойлгож, дэмждэг вэ?

            -Ээж маань намайг хүүхэд байхаас эхлэн дэмжиж ирсэн. Миний хамгийн том шүтэн бишрэгч шүү дээ. Зурагтаар миний тоглосон клип, кино гарахад бөөн баяр болдог. Хүүхэд байхад бүх зүйлээ зориулаад хүүгээ жүжигчин болгоно гэдэг байсан.  Дуртай зүйлээрээ мөнгө олоод ээждээ өгөх мэдрэмжийг үгээр илэрхийлэхийн арга шүү дээ. Миний тоглосон киноны диск, зургууд одоо ч ээжид маань хадгалаастай байдаг.

-Анхны дэлгэцийн уран бүтээлийнхээ тухай яриач?

            - Наймдугаар ангийн сурагч байхдаа “Еэ еэ шар буд аа” кинонд тоглож байлаа. Тэгээд их сургуулиа төгсөөд ангийнхаа найз нартаа хамт "360 градус" хошин мэдээллийн хөтөлбөрт жүжигчнээр ажиллаж эхэлсэн. Тухайн үед одоогийнх шиг сошиал хөгжөөгүй байсан болохоор зөвхөн телевизээр цацагддаг байлаа. Манай хөтөлбөрийн хувьд энгийн хошин байдлаар тэр үеийнхээ нийгэм улс төрийг шүүмжилсэн уран бүтээлүүдийг гаргадаг байсан.

-Та олон ангит кинонд ихэвчлэн тоглосон байдаг шүү дээ. Олон ангит кинонд тоглох хэр хүндрэлтэй байдаг вэ?

            -Анх цуврал хошин хөтөлбөрөөр танигдсан болохоор ч тэр үү сэтгэл дотно байдаг. Олон ангит киноны хувьд  зураг авалт удаан үргэлжилдэг болохоор уран бүтээлч эхлэхдээ өөрийгөө эрүүл мэнд сэтгэл санааны хувьд маш сайн бэлтгэсэн байх ёстой. Нэг жүжигчин өвдвөл кино тэр чигээрээ зогсож, санхүү цаг хугацааны хувьд алдагдалд ордог.

-Арав гаруй жил кино урлагт зүтгэсэн хүний хувьд монголын кино урлаг хэр түвшинд байна гэж харж байна вэ?

            -Монголын кино урлаг 90-ээд оны сүүл 2000 оны эхэн үеэр нэлээн уналтад орсон шүү дээ.  Одоо харин хурдацтай хөгжиж, сэргэн мандаж байна гэж би хувьдаа  боддог. Олон театр, продакшн, уран бүтээлийн  нэгдлүүд үүсгэн байгуулагдаж байна. Тоног төхөөрөмж жүжигчдийн уран чадварын хувьд жил ирэх тусам нэмэгдсээр байгаа. Үзэгчид маань ч театрт кино үзэх соёлд суралцсан харагддаг. Эхнээсээ монгол кинонууд гадны фестивальд амжилттай оролцож байна. 

-Дараагийн уран бүтээлдээ орсон гэж сонссон. Киноныхоо талаар товчхон яривал?

            -“Айдас үргээгч” хэмээх 15 ангитай кинон дээр ажиллаж байна. Энэ киноны хувьд анги болгон дээрээ жүжигчид болон зохиолын хувьд өөр өөр байгаа. Нийтдээ 100 гаруй жүжигчид оролцон тоглож байна. Анги бүр шинэ зохиол, жүжигчидтэй гэдгээрээ онцлог.