Дэлхийн кино урлагийн салбарт солонгос кино хүч түрэн орж, маш амжилттай яваа билээ. Солонгос киноны дэлхийн кино урлагийн салбарт гаргаж буй амжилтыг дурдаад баршгүй. Зөвхөн нэг ангитай кино гэлтгүй олон ангитай кино нь ч их үзэлттэй байдаг. Монголчууд "Жангум", "Эхнэрийн урхи", "Цэцэгнээс хөөрхөн хөвгүүд"-ээс эхлээд к-драматай салшгүй нөхөрлөж ирсэн. Тэгвэл  кабелийн телевизийн бүх цаг үеийн хамгийн өндөр ретингтэй 10 драматай танилцацгаая.

                                                         10. ВИНЧЕНЗО (Vincenzo)

   TVN телевизийн бүтээл, 14.636% ретингтэй. Италийн томоохон мафийн бүлэглэлийн зөвлөх өмгөөлөгч хийдэг Винчензо Касано төрөлх нутаг болох Солонгост ирж, шилдэг хуулийн фирмийн өмгөөлөгч Хун Ча Ён-той уулзан хамтдаа хуулиар шийтгэж чадахгүй томоохон зүйлтэй тэмцэх болсноор үйл явдал цааш өрнөнө.

                                                          9. Итэвон класс (Itaewon class)

 JTBC телевизийн кино, 16.548% ретингтэй. Парк Сэру сургууль дээрээ зодоон хийсний улмаас аав нь ажлаасаа халагдаж, өөрөө сургуулиасаа хөөгдөнө. Төд удалгүй аав нь ослоор нас барна. Ааваа алдсан, сургуулиасаа хөөгдсөн энэ бүхэнд зодооны гол эзний аавыг буруутгах тэрбээр тэдний эсрэг тэмцэхээр шийднэ. Тэгээд тэрбээр Сөүлийн хамгийн хөл хөдөлгөөнтэй дүүрэг, гадаадууд ихээр байх Итэвонд  өөрийн рестораныг нээснээр үйл явдал өрнөж эхэлнэ.

                                                           8. Хуримын шүлэг, салалтын ая

    Chosun телевизийн бүтээл, 16.582% ретингтэй. Бүх зүйл нь жаргалтай гэмээр гурван бүсгүйн аз жаргалтай амьдрал нэг л өдөр орвонгоороо эргэх болно.

                                                           7. Хатны нууц (Mr. Queen)

    TVN телевизийн кино , 17.371% ретингтэй. Хөх ордны  ахлах тогооч хилс хэргээр цагдаа нарт хөөгдөж явахдаа санамсаргүй осолд орж, Чусоны үед ирнэ. Тэрээр зүгээр ч нэг цаг хугацаагаар аялсан биш, бүр Чусон улсын хатны биед сэрэх нь тэр.

                                                             6. Ноён гэрэл гэгээ ( Mr. Sunshine)

   TVN телевизийн бүтээл, 18.128% ретингтэй. 1900-аад үеийн Солонгос улсын байдал ороо бусгаа байх бөгөөд Япон улс хэрхэн өөрийн эрхшээлд оруулж буй, түүний эсрэг ардын арми гэх нэрээр улсаа хамгаалж буй босогчдын талаар уг кинонд өгүүлнэ.

                                                               5. Сайн чөтгөр (Goblin)

     TVN телевизийн кино, 18.68% ретингтэй. Дайны бурхан гэгддэг жанжин Ким Шин эзэн хааныхаа атаархлын золиос болж хааны хатан болох төрсөн дүү, баатарлаг цэрэг эрсийнхээ хамт амиа алдана. Гэвч ард иргэд нь жанжныхаа үхэлд туйлаас харамсан буцаан авчрахыг хүсэж түүний илдний өмнө тасралтгүй залбирсанд Бурхан Ким Шинд олон хүний амь егүүтгэсэн шийтгэл хүртээн чөтгөр болгон дахин амилуулдаг. Эцэст нь бурхан түүний зовлонт амьдралыг төгсгөхөөр шийдэж, сүйт бүсгүйг нь дэлхий рүү илгээнэ. Гэвч тэр үе нь ирэхэд амьд үлдэхийг хэчнээн их хүсэхээ Гоблин хэрхэн мэдэх билээ.

                                                                 4. Дурсамж  1988 (Reply  1988)

   TVN телевизийн бүтээл, 18.803% ретингтэй. 1988 оны Сөүлийн хөрш айлын амьдрал. Нэг гудамжинд амьдардан таван гэр бүлийн тухай харуулна.

                                                                 3. Чам дээр буух хайрын буулт (Crash landing on you)

  TVN телевизийн кино, 21.683% ретингтэй.Ён Сэри бол том группын өв залгамжлагч нэгэн. Нэгэн удаа шүхрээр буух үед нь хүчтэй салхи гарсны улмаас газардаж чадалгүй Хойд Солонгосын хил давна. Хил давж газардсаны дараа тэрбээр Хойд Солонгосын офицер И Жон Хёктой таарах бөгөөд офицер бүсгүйг нууж, хамгаалахыг хичээнэ. Гэвч удалгүй залуу бүсгүйд дурлах нь тэр. Ингээд тэдний хайр сэтгэлийн талаар өгүүлнэ.

                                                                    2. Тэнгэрийн цайз ( Sky Castle)

   JTBC телевизийн бүтээл, 23.779% ретингтэй. Энэ бол Солонгос улсын баячуудын баян тансаг амьдрал, амжилт ололтын ард нуугдаж байдлыг  дэлгэсэн шилдэг бүтээл. Хэний ч дор орохыг үл хүсдэг тэд өөрсдийгөө хатад мэт, үр хүүхдүүдээ ханхүү, гүнж мэт байлгахыг хүсэж, гэр бүл, нөхрөө амжилтанд хүргэхийн тулд  бүхнийг хийдэг эмэгтэйчүүдийн түүхээр аялцгаана. Тэдний гайхалтай хэр нь, нууцлаг болон аймшигтай түүхийг харуулна.

                                                                     1.Хосуудын ертөнц ( The World of the married)

     JTBC телевизийн кино , 28.371% ретингтэй. Жи Сон Ү бол эмч. Тэрээр И Тэ У-тай гэрлэж, хүүтэй болжээ. Бүсгүйд бүх л зүйл байгаа мэт санагдах авч тэрээр удалгүй нөхөр нь болон түүний найз нөхөд түүнийг хуурч байсныг олж мэднэ.

                                                                                                                                                                                                                         Г. Хэрлэн