УИХ-ын дарга Д.Амарбаясгалан сэтгүүлчидтэй нээлттэй ярилцлага хийлээ. 

    СЭТГҮҮЛЧ: Дөрөвдүгээрт таны ойрын хамаатны хоёр, гурван хүнийг дахин цагдан хорьсон гэдэг мэдээлэл байна. Энэ асуудал дээр тайлбар өгөөч?

 Д.АМАРБАЯСГАЛАН: Миний ойрын хүмүүсээс цагдан хорьсон хүн байхгүй. Надтай найзалсан, найз байсан, хамт зураг даруулсан гэдэг агуулгаар нь хэд хэдэн хүнийг барьж, хориод байх шиг байна. Асуудал байвал надтай ярь. Битгий надтай хамаатуулж жирийн бизнес хийж байгаа хүмүүсийг бизнес, үйл ажиллагаагаар нь хохирол учруулаач ээ. Тэр бизнесийг босгож ирэх гэж тэр залуучууд насаараа зүтгэсэн гэдгийн хууль хяналтын байгууллага ойлгох хэрэгтэй. Хүмүүнлэг нийгэмд ийм эрүүдэн шүүлтийн хэлбэр байж болохгүй. Манай хууль хяналтын байгууллага баримт дээр тулгуурлахын оронд өөрсдийн бэлтгэсэн зарим хэвлэл мэдээллийн хэрэгслээр, нэр хаяггүй хаягаар дамжуулж ялладаг хэрэг хэрээс хэтэрсэн.

  СЭТГҮҮЛЧ: Таны сонгуульд нэр дэвшихэд гардаг санхүүжилт хаанаас гардаг вэ. Та хэдий хэмжээний хөрөнгөтэй хүн бэ?

  Д.АМАРБАЯСГАЛАН: УИХ-ын сонгуульд нэр дэвших боломж 2016, 2020 онд надад байсан. Гэхдээ энэ саналаас өөрийн хүсэлтээр татгалзаж, улс төрийн намыг институт болгох ёстой, төрийг удирдахаар сонгуульд өрсөлдөж байгаа нам, төрөөсөө хоцрогдсон байж болохгүй. Төрийг удирдах гэж байгаа намын боловсон хүчин мэргэжлийн чадваргүй байж болохгүй гэдэг зарчим барьж би өөрөө төвлөрч эрдэмтэн, судлаач, мэргэжлийн залуучуудыг урьж ажиллуулсан. МАН-ын олон шинэчлэлийг хийж хэрэгжүүлсэн байдаг. 2024 оны сонгуульд нэр дэвшсэн. Нэр дэвшээд тайлангаа аудитын байгууллагад гаргаад өгчихсөн байгаа. Надад хандив өгсөн байгууллагууд, хувь хүний нэр аудитын сайт дээр байгаа гэдгийг албан ёсоор хэлж байна.