УИХ дахь МАН-ын бүлэг хуралдаж, Засгийн газраас яаралтай горимоор хэлэлцэхээр өргөн мэдүүлсэн Төсвийн тухай хуульд нэмэлт, өөрчлөлт оруулах тухай хуулийн төслийг хэлэлцэх нь зүйтэй гэдэгт санал нэгджээ. Уг хуулийн төслөөр төсвийн тодорхой цагалбаруудыг өөрчлөхөөр тусгасан байна. Өөрөөр хэлбэл, төсөв өргөн барих, батлах цаг хугацаанд өөрчлөлт оруулах юм байна. Энэ талаар МАН-ын бүлгээс мэдээлэл хийлэээ.

УИХ дахь МАН-ын бүлгийн дарга Л.Мөнхбаатар "2025 оны төсвийн тухай хуулийг Засгийн газар хуулийн хугацаанд өргөн мэдүүлсэн. Үүнийг нь УИХ хүлээж аваад холбогдох хэлэлцүүлгийг хийх арваннэгдүгээр сарын 8-нд баталсан. Улмаар Ерөнхийлөгч төсөвт хориг тавьж, УИХ Ерөнхийлөгчийн хоригийг хүлээн авсан. Хоригийг хүлээн авсантай холбоотой цаашид хэрхэн хэлэлцүүлэх вэ гэдэг дэг шаардлагатай болсон. Учир нь энэ харилцааг зохицуулсан зохицуулалт хангалтгүй байсан. Чуулган нэгдсэн хуралдаанаар Дэгийг олонх дэмжээгүй учраас Төсвийг УИХ-аас Засгийн газарт буцаах шийдвэр гарсан. Үүнтэй холбоотой Засгийн газар Төсвийн хуульд нэмэлт, өөрчлөлт оруулах төсөл боловсруулан оруулж ирсэн байна. Энэ нэмэлтээр Улсын төсөв өргөн барихтай холбоотой тодорхой цагалбар байдаг. Үүнийг хялбаршуулж өргөн баръя, тодорхой зохицуулалт хийе гэсэн. Ингээд Төсвийн тухай хуульд нэмэлт, өөрчлөлт оруулах тухай хуулийн төсөл оруулж ирсэн. Үүнийг МАН-ын бүлэг хэлэлцэж, нэн яаралтайгаар хэлэлцэхийг дэмжсэн. Үдээс хойш 14:00 цагаас яаралтай горимоор хэлэлцэхээр чуулганы хуралдааныг зарлаад байна" гэлээ.

Сангийн сайд Б.Жавхлан "Ерөнхийлөгчийн хоригийн хүрээнд УИХ Засгийн газарт 2025 оны төсвийг дахин боловсруулж, оруулахаар буцаасан. Улмаар арванхоёрдугаар сарын 10 гэдэг хугацаа заасан. Мөн шинэ нөхцөл байдал үүссэн. Тиймээс хуулийн зохицуулалт өргөн барьсан. Төсвийг нэг удаа өргөн барьдаг хуулийн цагалбартай байсан. Төсвийн ерөнхий хуулиараа есдүгээр сарын 1-нд төсвөө өргөн барих цагалбартай. Зургаан сар бэлтгэж өргөн барьдаг. Уг нь бол төсвөө өргөн мэдүүлэхдээ анхан шатны сургуулийн захирлаас хүртэл санал авч, шат шатанд санал авч боловсруулдаг. Энэ удаад Засгийн газар цагалбарынхаа хүрээнд төсвөө өргөн барьсан. Тэгэхээр 2025 оны төсвийг дахин хэлэлцүүлэх шаардлагагүйгээр есдүгээр сард өргөн барьсан төсвийн суурин дээр засвар хийж өргөн барих юм. Тиймээс анхан шатнаас нь тоонуудаа цуглуулах шаардлагагүй. Төсвийн цагалбараа өөрчилсний дараа Засгийн газар 2025 оны төсвийг дахин өргөн барина. МАН бүлэгт төсвөө танилцуулсан. Бүлэг 100 хувийн саналаар яаралтай горимоор хэлэлцэхийг дэмжсэн. Үүнийг чуулганаар хэлэлцүүлж дэмжснээр 2025 оны төсвийг өргөн барих эрх зүйн үндэс бүрдэх юм" гэлээ.