Эрчим хүчний асуудлаар мэдээлэл өглөө. Энэ үеэр Эрчим хүчний сайд Б.Чойжилсүрэн мэдээлэл өглөө. Тэрбээр “Монголын эрчим хүчний салбар 102 жилийн түүхтэй. Сүүлийн 34 жил нь нэг нийгмээс нөгөө нийгэмд шилжиж байгаа. Эрчим хүчний чадал энергийн хувьд долоо орчим хувьтай бол чадлын хувьд 12 хувьд хүрдэг. Жилийн дундаж чадлын өсөлт 200 мкв давж байгаа. “ДЦС-3” 193 мкв-ийн хүчин чадалтай байгаа бол жил бүр “ДЦС-3” дээр тэнцэх хэмжээний станцыг ашиглалтад оруулахаас өөр аргагүй. Ирэх жилүүдэд “ДЦС-3”-тай тэнцэх хэмжээний чадалтай станцыг нэмж ашиглалтад оруулах асуудал үүсч байгаа. Нэг хүнд ногдох цахилгаан, эрчим хүчний хэрэглээг хөгжингүй орнуудтай харьцуулахад хэчнээнээр бага байгаа. Хоёр хөрштэйгөө харьцуулахад нэг хүнд ногдох цахилгааны хэрэглээгээр одоогийн байдлаар дөрөв дахин бага байгаа. Сүүлийн жилүүдэд эрчим хүчний салбар алдагдалтай ажиллаж эхэлсэн. Зах зээлд шилжиж чадаагүй цөөн салбарын нэг нь эрчим хүчний салбар. Эрчим хүчний борлуулалтын үнийг төрөөс тогтоож, тариф болгоод улс даяар мөрдүүлдэг. Зардал нь зах зээлийн ханшаас гардгаас шалтгаалж, сүүлийн жилүүдэд өссөн. Өнгөрсөн жил 357 тэрбум төгрөгийн алдагдалтай ажилласан. Урт хугацаатай өр төлбөрийн хувьд нэг их наяд найман зуун тэрбум төгрөгийн өртэй нөхцөл байдалд орсон. Цахилгааныг 285 төгрөгөөр үйлдвэрлэж, дундаж үнэ нь 216 төгрөг. Энэ хэмжээгээрээ алдагдал хүлээж байгаа.  Эрчим хүчний салбарт техник, санхүүгийн хувьд алдагдалтай нөхцөл байдал үүссэн” гэв.