Ардчилсан намын дарга Лу.Гантөмөрийг намын даргаас нь огцруулахаар Говь-Алтайн Засаг дарга асан, УИХ-ын гишүүн О.Амгаланбаатар тэргүүтэй хэсэг хүмүүс гарын үсэг цуглуулж эхэлжээ. Ингэснээр Ардчилсан намынхны арслантай тамганы зодоон ахиад эхлэх болзлоо хангаж байгаа гэсэн  үг юм.

             Дүрмээрээ бол УИХ-ын сонгуульд үнэмлэхүй ялагдал хүлээснийхээ хариуцлагыг хүлээж Лу.Гантөмөр Ардчилсан намын даргаас огцорч, дараагийн даргыг сонгох байлаа. Гэвч Ардчилсан намын даргын томилгоог намын гишүүд нь бус эрх баригч намынхан шийддэг болсноор Л.Гантөмөр суудалтайгаа үлдэж, үлдсэн нь дэмий л шогшрохоос өөр аргагүй болсон. Хэрэв зээ Ардчилсан намынхан дүрмээ дагаж, даргаа огцруулах юм бол дахин арслантай тамгаа хувилж, хулгайлж, зугтаасан гэх хошин жүжиг шинээр дэлгэгдэж, АН-ынхныг хагалах хар зураг зурагдчихсан байгаа гэсэн үг.

        Нэг ёсондоо Улсын дээд шүүхээр намын даргыг баталгаажуулдаг дүрэм  үйлчилж байгаа цагт АН-ын даргыг МАН шийдэж, хэнийг үлдээж, хэнийг томилох вэ гэдгийг шийдэж байгаа учраас Ардчилсан намынхан Л.Гантөмөрийгөө эсэргүүцэж ч чадахгүй ацан шалаанд орчихоод байгаа гэлцэх нь бий. Тиймээс Лу.Гантөмөрийг намынхан нь МАН-аас АН-д суусан “БЭТ” гэсэн нь хоосон хошигнол биш гэсэн үг.

        Гэхдээ нам дотроо даргыг суудлаас нь буулгах кампанит ажил чимээгүйхэн өрнөж, гарын үсэг зуруулах ажиллагаа ч өрнөөд эхэлнээс харахад Ардчилсан намынхны хагарал туйлдаа хүрч байгаа нь илт байна.              

     Уг ажлыг Говь-Алтайн Засаг даргаас Их  хуралд суусан О.Амгаланбаатар өрнүүлж байгаагаас харахад УИХ-ын гишүүн Х.Баттулгын бүлэглэл арслантай тамгыг авах ажилдаа шуурхайлж орсон бололтой. Тодруулбал, О.Амгаланбаатар Х.Баттулгын  гэх шошготой Их хуралд суусан нэгэн. Говь-алтай аймгийн Бигэр сумын уугуул. 2006 оноос хойш Бургастайн гааль, Эрдэнэтийн гааль, Гашуун сухайтын гаальд тус тус гаалийн байцаагчаар ажилласан. Улмаар 2014 онд гэнэтхэн Говь-Алтай аймгийн Засаг дарга болж тодорсон. 2016 онд чөлөөлөгдөж, 2017 оноос Ерөнхийлөгч Х.Баттулгын зөвлөхөөр ажиллаж байгаад 2020 оны УИХ-ын сонгуульд Говь-Алтайгаасаа нэр дэвшсэн ч ялагдсан. Улмаар энэ жилиийн сонгуулиар даагаа нэхэж, гишүүн болоод удаагүй байна.

АН-ЫН ЗАЛУУС “ЯНЗАГА” ГЭХ ФРАКЦ ҮҮСГЭЖ, ТУСДАА ГАРЧЭЭ

          Цаашлаад Ардчилсан намд шинэ нөхцөл байдал үүсэж, АН-ын залуус өрх тусгаарлаж эхэлсэн гэнэ. Тодруулбал, УИХ-д шинээр суусан залуу гишүүд тусдаа гарч “Янзага” гэх шинэ фракц бүрдүүлжээ. Тус фракцыг одоогийн УИХ-ын гишүүн С.Цэнгүүн, Ч.Лодойсамбуу, Ш.Бямбасүрэн, Г.Очирбат тэргүүтэй залуус ахалж, бүлгийн хуралдаан дээр намынхаа ах нарт хатуухан шаардлага тавьж, ширүүхэн маргасан гэх бор шувуу Ардчилсан намынхан дунд нисэх боллоо.

      Шинээр байгуулсан “Янзага” фракцынхан хэн хэний хүн гэхээсээ илүү Ардчилсан намын хууччуулд анхааруулга сануулга өгч намынхаа үйл ажиллагааг заламжлах дараагийн үеийг бэлтгэх том ажлуудыг ч эхлүүлэхээ мэдэгдсэн байна.

          Тиймдээ ч залуу үеийнхэн нам дотроо багагүй дэмлэгтэй байгаа сурагтай. Цаашлаад улс төрд оруулсан ах нар нь тэднийг бүлэг байгуулсанд дургүйцэж, ширүүхэн яриа ч өрнөсөн гэх нь бий.

АРДЧИЛСАН НАМЫН САЙД НАРЫН ХАГАРАЛ

          Ийн Ардчилсан намынхан Төрийн ордонд шуудайнд хийсэн үхрийн эвэр шиг үзэл санаа үйл хэрэг нь хэдэн тийшээ салж, тун таагүй байгаа гэнэ. Тэр тусмаа Засгийн газарт суусан сайд нар нь дотроо “зодоон”-той байгаа гэх мэдээлэл ч байна. Өөрөөр хэлбэл, Засгийн газарт суусан Х.Баттулга болон Л.Гантөмөрийн бүлэглэлийнхэн дотроо хэд хэд хуваагдсан гэдгийг ч Сааарал ордныхон жиг жуг гэлцэх болжээ. Эндээс харвал, АН-ынхан доогуураа нэгдэж, намын даргаа суудлаас нь татан буулгахад тун ойрхон байна. Л.Гантөмөр буланд шахагдаж, намын гишүүдээсээ ч, ард түмнээс ч өндөр оноо авахаа болих нь. АН-ынхан Л.Гантөмөрөөс намын даргын суудлаа авчихвал тэр ганцаардах нь тодорхой. Хүчгүй, шүдгүй “арслан” болно гэсэн үг. Ард түмэн Л.Гантөмөрт багахан ч гэсэн итгэл хүлээлгэсэн үү, хүлээлгэсэн. Тэр гэхдээ итгэлийг нь даагаагүй. Сөрөг хүчний үүргээ гүйцэтгэх ёстой атал сайдын суудалд заларчихсан.

        Ийн Ардчилсан намынхныг учраа олохгүй тэмцэлдэж байгааг МАН-ынхан чимээгүйхэн ажиглаж, хамтарсан Засгийн газраас сайд нарыг нь шахах ажлыг ч сэм явуулж эхэлсэн бололтой. Өөрөөр хэлбэл, энэ удаагийн Засгийн газарт хамгийн их хэл ам дагуулах салбарын сайд нараар Ардчилсан намынхныг томилчихсон. Цаашлаад Ардчилсан намаас томилогдсон  сайд нараарард түмэнд муухай харагдуулах ажлыг гардаж хийлгэх ажлыг ч тэд хэдийнээ хийгээд эхлүүлсэн гэдэг. Хамгийн сүүлд гэхэд л АН-аас томилогдсон сайд Э.Одбаярын дуулиан олны дургүйцлийг хүргэсэн бол Түгжрэлийн сайд О.Эрхэмбүрэн буруу хүртэй машиныг цаашид хориглоно гэх агуулга бүхий мэдээлэл хийгээд буланд шахагдаж эхэлсэн. Эндээс харвал Ардчилсан намын сайд нар тун удахгүй хамтарсан Засгийн  газраас шахагдаж, намын дарга ч үгүй хоцорч мэдэхээр байна.